A terceira e última das rotacións que conformaron a misión española en Afganistán xa está na casa.

Os últimos militares, ao redor de 113, pertencentes a Brigada de Infantaría Lixeira (Brilat) chegaron na tarde deste mércores ao Aeródromo Militar de Lavacolla completando o repregamento de tropas iniciado hai escasas semanas.

Á chegada do voo, procedente de Herat, as tropas foron recibidas con emoción polos seus familiares catro meses despois da súa marcha e coa satisfacción do traballo ben feito ao mando da misión 'Resolute Support', asumida por un continxente creado sobre a base do Batallón Zamora, pertencente ao rexemento Isabel La Católica 29 con sede en Figueirido.

Foi a sexta misión da Brilat en Afganistán, na que o seu labor se centrou en garantir a seguridade da base de Camp Arena, na que conviven militares e civís de múltiples nacionalidades.

Concluído o repregamento, a base pontevedresa só conta cunha misión internacional activa, en Mali, na que están despregados 110 soldados dos cuarteis de Figueirido e Cabo Noval (Asturias). O seu regreso está previsto que se produza ao longo do mes de abril.