O BNG esixe a Fomento que sancione a Audasa polos atascos na AP-9
Por Redacción
A portavoz do BNG no Congreso dos Deputados, Olaia Fernández Davila, esixe ao Ministerio de Fomento que sancione á concesionaria da autoestrada AP-9, Audasa, polo "enorme atasco" rexistrado durante a fin de semana na peaxe de saída cara a autovía de O Salnés, en dirección a lugares tan turísticos como Sanxenxo e O Grove.
Davila presentou este luns unha iniciativa parlamentaria na que recorda ao Ministerio que "ten potestade para sancionar á concesionaria" e quizáis ese sería o mecanismo que obrigase á empresa a reaccionar ante os episodios de atascos quilométricos ante as cabinas de cobro de peaxes.
A nacionalista formula unha batería de preguntas á ministra de Fomento, Ana Pastor, nas que lle recorda que nesta ocasión miles de conductores víronse atrapados nunha grande cola na peaxe de saída cara a autovía de O Salnés e tiveron que agardar máis dunha hora ata acadar a cabina de pago, nunha zona onde recorda que "hai moi poucas cabinas".
Olaia Fernández critica que a Xunta "leva quince días anunciando que se vai queixar ou que envía escritos de protesta, pero nada máis"
Davila critica a actitude de Audasa, que seguiu o mesmo guión das últimas veces: manter os conductores á espera no interior dos seus coches ata satisfacer o "costosísimo importe dun servizo que está moi por debaixo do requerido". "O único xesto de Audasa consistiu en reforzar cunha persoa o cobro da peaxe, iniciativa que non aliviou a situación", censura.
Olaia Fernández Davila lembra que no pliego de condicións de explotación doutras autoestradas do Estado, figura a obriga de que a empresa concesionaria levante as barreiras das cabinas de pago en caso de atascos superiores a dous quilómetros de lonxitude, algo que debería facer Audasa tamén posto que as retencións son quilométricas.
A nacionalista censura a actitude da Xunta e do Ministerio porque "Fomento limítase a pedir ou exixir ou anunciar que exixirá á concesionaria que non se repitan estas situación", pero en ningún momento sanciona á empresa por un mal servizo. No caso do Goberno galego critica que "leva quince días anunciando que se vai queixar ou que envía escritos de protesta, pero nada máis".
Nos últimos días, a deputada do PNV no Parlamento europeo e representante na eurocámara de Compromiso por Galicia, Izaskun Bilbao, xa anunciou que presentou unha iniciativa para buscar a implicación da Comisión Europea na resolución dos atascos que se producen, especialmente en cada verán, na AP-9.
Relacionadas:
-
Fomento amenaza a Audasa con retirarlle a concesión da AP-9 se se reiteran os problemas
Por Alejandro Espiño |
-
Fomento abre expediente a Audasa polas "retencións inxustificadas" na autoestrada AP-9
Por Redacción |
-
Unha avalancha de coches colapsa os accesos ás praias
Por Redacción |
-
Denuncian en Bruxelas o "comportamento abusivo" de Audasa polos atascos na AP-9
Por Redacción |
-
Atascos quilométricos nos accesos ás praias
Por Redacción |