Fomento amenaza a Audasa con retirarlle a concesión da AP-9 se se reiteran os problemas
Por Alejandro Espiño
A presión sobre Audasa, concesionaria da autoestrada AP-9, intensifícase. A ministra de Fomento, Ana Pastor, advirte que se se repiten os reiterados atoamentos nas peaxes e non se toma ningún tipo de medida para aliviar o tráfico cabería a posibilidade de anular a concesión. Así o asegurou en Pontevedra, cidade á que acudiu este sábado para comprobar o estado das obras na estación de RENFE.
Ana Pastor sinalou que Fomento xa abriu un expediente para investigar "qué ha pasado en cada uno de los peajes". Explicou que unha das obrigas de Audasa é realizar un control da calidade do servizo que se lle dá aos cidadáns e o seu departamento entende que non realizou correctamente, á vista dos atoamentos que se están a producir de forma continua os días de maior afluencia ás praias e localidades turísticas.
"Si se ven incumplimientos habrá sanciones y es más, si hay reiterados incumplimientos incluso se podría abrir un expediente de anulación de la concesión", avanzou a titular de Fomento, que insistiu en que Audasa debe dar un bo servizo aos cidadáns. "Todos sabemos que puede haber momentos determinados en los que puede haber más tráfico, pero lo que no se puede es ante la reiteración de atascos no dar soluciones".
Neste sentido, Ana Pastor, que reiterou que "si hay incumplimientos reiterados, no me temblará el pulso en ordenar la suspensión", destacou que dende este sábado haberá inspectores de Fomento nas peaxes da AP-9, especialmente durante as fins de semana e festivos, "para que vean in situ qué es lo que está pasando". Asegurou que se trata dunha medida de control "que no se ha hecho nunca en la historia de la autopista".