Vilanova de Arousa espera bater o récord de participación na Festa do Mexillón e o Berberecho
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
A Estación Marítima Mar de Santiago acolleu este mércores a presentación do programa da XXX Festa do Mexillón e o Berberecho de Vilanova de Arousa.
O acto contou coa presenza do alcalde vilanovés, Gonzalo Durán; a deputada de Turismo, Nava Castro, e do tenente de alcalde e deputado provincial, Javier Tourís.
Na súa intervención, Gonzalo Durán puxo de manifesto a importancia desta celebración e espera que "esta trixésima edición da Festa do Mexillón e o Berberecho bata todos os récords de participación e asistencia".
O rexedor animou a cidadanía e visitantes a achegarse a Vilanova de Arousa para gozar deste evento que se desenvolverán entre os próximos días 8 e 11 de agosto.
Pola súa banda, Javier Tourís tamén animou a residentes e foráneos a deleitar os seus padais coa gastronomía da vila. "Vilanova é o primeiro porto de descarga de mexillón de Europa e durante a nosa festa convértese no epicentro da venda do marisco de Pontevedra", asegurou, poñendo de manifesto a gran importancia que "o sector do mar ten no PIB do Concello".
Finalmente, Nava Castro felicitou o labor de promoción levada a cabo polo Concello a favor desta celebración. "É un dos exemplos onde uns produtos gastronómicos como o mexillón e o berberecho son quen de converterse nos grandes protagonistas e posicionar un destino como Vilanova como referente", aseverou a deputada de Turismo de Pontevedra.
O programa festivo comezará coa apertura da carpa gastronómica na Praza do Castro, na que o Concello espera superar os 5.000 comensais.
O evento continuará coa tradicional Feira de Oportunidades, que reunirá a máis de vinte comercios locais de Vilanova na Avenida do Recheo.
O espectáculo de Orquestra Panorama será o venres 9 de agosto ás 23.00 horas no Parque do Cabo e o sábado 10 de agosto ás 22.00 horas na Praza do Castro será o concerto de Antonio Barros & Lis Pardo, mentres que a actuación de Roi Casal será o domingo 11 de agosto ás 21.00 horas no Xardín Umbrío.
O día grande da XXX Festa do Mexillón e do Berberecho de Vilanova de Arousa será o domingo 11 de agosto. O acto central comprenderá a lectura do pregón e a entrega das Insignias de Ouro e Brillantes, que terá lugar ás 13.30 horas na Praza do Castro.
Relacionadas:
-
Case 5.000 persoas quedan impresionadas coa Panorama en Vilanova
Por Anxo Lourido |
-
Vilanova de Arousa convida a gozar da Festa do Mexillón e do Berberecho
Por Oskar Viéitez |
-
Asinado o convenio para a construción dunha senda peonil entre Baión e András
Por Redacción |
-
Primeiros brindes en Cambados co inicio da 72 Festa do Albariño
Por Alejandro Espiño |
-
Panorama, Sés, Xabier Díaz e Combo Dominicano animarán Caldas nas festas de verán
Por Redacción |