"Compracer nunca, Con pracer sempre", a campaña contra as agresións sexuais que se estreará en PortAmérica
Por Mónica Patxot & María José Pita
Este venres 5 de xullo o festival PortAmérica será o punto de arranque da campaña da Deputación de Pontevedra "Compracer nunca, Con pracer sempre". Esta iniciativa ten como obxectivo previr e actuar contra as agresións sexuais.
A deputada de Igualdade, Sandra Bastos, explicaba que nesta ocasión se pretende concienciar sobre as violencias categorizadas como "violacións en cita", é dicir, aquelas perpetradas por coñecidos da moza agredida, e as "agresións por submisión química". No acto de lanzamento da campaña tamén participou a profesora e poeta Carmen Quinteiro, autora do libro no que se inspirou o lema escollido este ano pola institución provincial.
Trátase dunha campaña informativa dirixida á mocidade para sensibilizar, concienciar e informar sobre un tipo de violencia de xénero que, como asegurou a responsable provincial de Igualdade, é "das máis comúns entre a mocidade".
A Deputación promove esta campaña que, tras comezar no festival PortAmérica esta fin de semana, percorrerá os festivais que forman parte dos Rías Baixas Fest, antes de estenderse a outros ámbitos. O organismo provincial porá a campaña a disposición dos 61 concellos da provincia, así como dos centros educativos e entidades.
"Consideramos vital intervir nos contextos de ocio, nas contornas lúdicas, de festa, que acotío son escenarios de acoso sexual ás mulleres. Por iso queremos levar esta campaña ás festas locais, festivais e encontros dirixidos á mocidade", manifestaba Sandra Bastos.
A campaña tamén busca dirixirse os mozos con outra mensaxe: "Non a Líes. Alíate", para transmitirlles a necesidade de posicionarse claramente fronte a ela.
PUNTOS VIOLETA
Como parte da campaña, instalaranse os coñecidos como "Puntos violeta", unha carpa atendida por un equipo de profesionais expertas en igualdade que informará ás persoas interesadas, e no que se distribuirán as guías informativas deseñadas especialmente para a campaña e outro material, como gorros e pulseiras.
Este stand permitirá un trato directo co público asistente, favorecendo a interacción coas persoas asistentes a estas festas e festivais.
CIFRAS PREOCUPANTES
Bastos lembrou a importancia de poñer en marcha este tipo de campañas porque "as cifras son desoladoras".
En concreto, referiuse ao balance de 2023 do Ministerio do Interior, que revela que o pasado ano foi o peor en canto a delitos sexuais.
"Falamos de 4.875 violacións e 19.981 delitos contra a liberdade sexual no 2023 (...). Por iso erradicar esta violencia sexual é un dos obxectivos máis urxentes na loita contra a violencia cara as mulleres. E unha das principais claves para conseguilo é o desenvolvemento de campañas de prevención eficientes e con recursos como esta", remataba a deputada de Igualdade.