Unha muller e os seus dous fillos, ameazados por un desafiuzamento en Marín que reclama a familia paterna dos menores
Por Redacción
Ante a perentoria situación á que fai fronte e que considera é unha "inxustiza habitacional e violencia económica", unha veciña de Marín decidiu facela pública por se a presión social puidese reverter a tesitura. Isto é, paralizar unha orde de desafiuzamento que a deixaría fóra do piso no que vive cos seus fillos de nove e seis anos.
Segundo relata a muller, "hai un ano e medio que tiña que terme ido, pero aprazárono ata o 31 de decembro. Tiña que deixalo o 14 de maio, pero a asistenta social fixo un informe e agora estamos á espera da valoración do xuíz", o cal pode resolverse cunha orde de execución do desafiuzamento ou tamén con outra prórroga, explica.
O caso tramítase nos Xulgados de Marín, aínda que paralelamente "tivemos outro xuízo para que se recoñecese que a vivenda era do matrimonio e en Marín arquiváronmo e despois en Pontevedra o mesmo, por falta de probas dixeron, a pesar das transferencias e os préstamos persoais nos que pon compra de piso e reforma".
Estes problemas xurdiron en 2021, cando "na sentenza do divorcio sobre a custodia dos nenos ditaminouse custodia compartida e dicíase que a nai na casa cos nenos. A partir de aí foi cando empezaron a buscar formas de botarme".
Os antecedentes que relata esta muller arrincan en 2012, cando coñeceu ao home co que casou en 2014. Durante seis anos e medio, debido ao traballo del, residiron en Canarias e alí naceron os dous fillos que teñen en común.
Estando nas illas, o seu sogro compra unha vivenda en Marín, que tiña en alugueiro e era propiedade do Ministerio de Defensa. Segundo relata a afectada "transcorridos seis anos a escriturarían ao noso nome e con esa promesa asumimos un préstamo persoal e transferimos diñeiro aos meus sogros para a compra da vivenda".
Con todo, continúa, "a vivenda se escrituró ao seu nome e asinouse un documento de recoñecemento de débeda sen o meu coñecemento". A parella iniciou unha reforma custeada por ambos, do mesmo xeito que comunidade e subministracións.
Unha vez completada, trasladáronse a vivir a Marín. Nove meses despois, cando el inicia un proceso de divorcio, "o meu ex marido e os seus pais negaron que a vivenda fose nosa" e iniciaron o proceso de desafiuzamento desta muller e os seus dous fillos. Ao mesmo tempo a súa ex parella reclámalle "a metade dos préstamos utilizados para comprar a vivenda a pesar de que non eu non figuro como propietaria".
Relacionadas:
-
Responden á muller con orde de desafiuzamento en Marín: "sabe que está a ocupar unha vivenda que non é da súa propiedade"
Por Redacción |
-
Inventa un desafiuzamento inminente para pedir diñeiro a unha amiga da familia e úsao para comprar un BMW
Por Natalia Puga |
-
Desaloxada por segunda vez por non pagar o aluguer
Por Natalia Puga |
-
O Goberno aproba axudas ao aluguer e prohíbe os desafiuzamentos durante seis meses
Por Alejandro Espiño |