Lanzan un SOS para deter o uso da "falsa Síndrome de Alienación Parental" nos xulgados de Pontevedra
Por Natalia Puga & Mónica Patxot
Nais e avoas de nenos e nenas que nos últimos tempos viron como os informes do Imelga, dos Puntos de Encontro Familiar (PEF) e dos Gabinetes de Orientación Familiar afectaron nos procedementos de custodia de menores aplicando os postulados da "falsa Síndrome de Alienación Parental" seguen alzando a voz e este luns concentráronse ás portas dos xulgados de Pontevedra.
Estas mulleres quixeron preservar a súa identidade para non expoñer aos seus fillos e fillas, pero non quixeron permanecer caladas e, portando pancartas, foron alí onde cren que está a orixe da "violencia institucional" que sofren, a sede xudicial pontevedresa.
Nesas pancartas denunciaban que "los equipos psicosociales de Pontevedra apoyan al maltratador y encierran a sus hijos/as en centros de menores como si los enfermos fueran ellos". En declaracións a PontevedraViva explicaron que o que queren dicir con esta afirmación é que, cos seus informes, motivaron "arrancamentos de maneira violenta" de menores que terminaron en centros de menores sen ver á súa familia.
Respecto diso, cabe lembrar casos recentes xa denunciados neste xornal como os de casos de Cambados e Marín nos que os xulgados, en pleno proceso para revisar custodias, optaron por sacar aos nenos e nenas do colexio e levalos a centros de menores para "desintoxicalos" da súa nai por esa suposta Síndrome de Alienación Parental (SAP).
As nais e avoas que se concentraron este luns lembran a esas nais, pero tamén a moitas outras como unha cuxos nenos "están a vivir día tras día con ansiedade e medo e angustia porque conviven con persoas coas que nunca queren estar e que as tratan mal".
"Está a irse aos colexios para arrincar aos nenos da súa contorna coñecida, obrigándoos a vivir con pais que foron ausentes ou non os trataban ben. Hai nais que levan máis dun ano e medio sen ver aos seus fillos hai outros casos que deciden internar aos nenos en centros de menores, supostamente para desintoxicar os do agarimo das súas nais", relatan.
Non dan nomes para que ninguén apunte aos seus fillos e os revictimice, pero si contan casos e lanzan un SOS. "Basta ya de Tortura institucional a madres e hijos/as", poñía unha desas pancartas e, en persoa, alertan das "consecuencias devastadoras " deses informes que emiten os equipos psicosociais de Pontevedra para os nenos e as nenas.
Denuncian que eses equipos "deberían estar formados en infancia e ter perspectiva de xénero e non o están e estase vendo as graves consecuencias" e lanzan un chamamento "para que isto pare, xa que é unha tortura tanto para nenos como para as nais e as familias que logo están a sufrir".
Para estas nais e avoas, "En Pontevedra, informe psicosocial = falsidade documental" e alertan de que "los equipos psicosociales de Pontevedra les están robando la infancia a nuestros hijos".
Estas mulleres síntense "vítimas de violencia institucional e xustiza patriarcal" e queren denunciar as prácticas do Instituto de Medicina Legal de Galicia (Imelga), os PEF e os Gabinetes de Orientación Familiar e dos xulgados que fundamentan as súas decisións nestes informes "para facer prevalecer unha visión sobrevalorada da figura paterna, a que non estivo presente durante a convivencia, interpretando que o interese superior das criaturas é ter un contacto fluído co proxenitor, cando nunca antes tivérono ou, no seu caso, foi prexudicial para elas".
Como parte do seu SOS, esixen que se respecte a vontade e o desexo das súas fillas e fillos para que convivan con quen autónomamente decidan e que establezan cos seus proxenitores a relación que queiran, "sen ter que someterse a medidas coercitivas dos PEF nin dos Gabinetes de Orientación Familiar".
Relacionadas:
-
O "inferno" dunha custodia compartida por quincenas cun neno de 3 anos e un pai de "incumprimentos constantes"
Por Natalia Puga |
-
"Como te sentirías se cando eras pequeno te separaran da túa nai e te obrigaran a vivir co teu pai maltratador?"
Por Natalia Puga & Mónica Patxot |
-
Desesperada, entre bágoas, implora axuda: "Levo 57 días sen poder ver nin falar coa miña filla"
Por Natalia Puga |
-
"Non son catro tolas desesperadas, son nais que están a loitar polos seus fillos e fillas"
Por Natalia Puga & Mónica Patxot | Creada e actualizada
-
Unha nena acaba nun centro de menores en plena disputa pola custodia e apelando á síndrome de alienación parental
Por Natalia Puga |
-
Máis de 75 colectivos asinan unha queixa formal por "violencia institucional" pola polémica custodia de Cambados
Por Natalia Puga |
-
Denuncian "violencia institucional" cara a unha nai que se enfronta á retirada da patria potestade
Por Natalia Puga |
-
A "tortura terrible" dunha nai tras perder a custodia dos seus fillos por suposta alienación parental
Por Natalia Puga |