López preocúpase pola "escasa" cifra económica que o Ministerio de Transportes investirá na mellora da rede de estradas
Por Anxo Lourido
O presidente da Deputación de Pontevedra, Luis López, trasladaba este venres a "preocupación" do equipo de goberno da entidade provincial ante o anuncio efectuado polo Ministerio de Transportes e Mobilidade Sostible de destinar 8,7 millóns de euros en tres anos para efectuar traballos de conservación e explotación en estradas pertencentes ao Estado que percorren a provincia de Pontevedra.
López lembrou que no pleno provincial do 2 de abril se aprobara cos votos favorables do PP e do BNG unha petición ao Ministerio para que elaborase un proxecto integral con orzamento suficiente para modernizar e mellorar estas estradas nacionais, un total de once vías con 317 quilómetros "que vertebran a provincia".
O máximo mandatario provincial considera que o anuncio do Goberno é unha resposta "improvisada, confusa e insuficiente" por parte do Ministerio ao non ofrecerse "proxecto, nin orzamento, nin cronograma detallado".
Lembrou, neste sentido, que a Deputación aprobou no mesmo pleno un investimento de 39 millóns de euros en catro anos, cun de prórroga, para a mellora e conservación das estradas provinciais. Por este motivo entende que o orzamento anunciado polo Goberno estatal contempla unha "cifra escasa" para cubrir as necesidades dos usuarios.
Luis López engadiu que unha asociación de empresas de conservación e explotación de infraestruturas estima que se deben investir 38.000 euros ao ano por quilómetro, o que supoñería para as estradas do Estado na provincia un investimento de 12 millóns de euros ao ano. "Isto sería o mínimo", manifestou o presidente provincial apuntando que a deterioración sufrida polas estradas nos dous últimos anos obrigaría a que o investimento fóra dun mínimo de 15 millóns de euros ao ano.
"Isto non vai de confrontar", aclarou López, "os 8,7 son ben recibidos pero non son suficientes para cubrir as necesidades estruturais das estradas" e insistiu en pedir ao Ministerio que atenda unha "demanda maioritaria".
RETOQUES NA ORGANICACIÓN DA DEPUTACIÓN
López tamén avanzou os "retoques mínimos" na organización do goberno provincial coa saída de José López Campos, novo conselleiro de Cultura, Lingua e Xuventude.
Belén Cachafeiro, primeira suplente, ocupará o seu posto, asumindo fondos europeos, innovación e axenda dixital, área que levaba María Ramallo, que agora asumirá a cooperación local. Pola súa banda, Alejandro Lorenzo sumará ás súas competencias a responsabilidade de Emerxencias.
Precisamente, o presidente recoñeceu o traballo desenvolvido ata o de agora por José López tanto no Plan +Provincia como converténdose nun dos "artífices en chegar a acordo para atender as reclamacións" durante o conflito dos Bombeiros comarcais. "Galicia necesita bos xestores coa bagaxe de José López", concluíu.
Relacionadas:
-
Luis López critica o "enésimo desprezo" do Goberno á provincia ao descartar a construción dunha autovía a Ourense
Por Oskar Viéitez |
-
O subdelegado reparte chalecos reflectantes entre peóns e ciclistas
Por Oskar Viéitez |
-
Aprobada a mellora da estrada entre O Campo e Pardavila con 1,2 millóns de euros
Por Anxo Lourido |
-
O PP reclama ao Ministerio a mellora de 60 quilómetros da rede viaria estatal de Caldas e O Salnés
Por Oskar Viéitez |
-
A Deputación licita a conservación integral da rede viaria provincial e esixe ao Ministerio que mellore o firme da súa
Por Oskar Viéitez & Mónica Patxot |
-
Supervisión dos traballos de conservación de firme nas estradas de Cerdedo-Cotobade
Por Redacción |
-
A Deputación destina 4,5 millóns de euros para conservar o firme das estradas provinciais
Por Oskar Viéitez |