Primeiro foi Fariña. Os narcos galegos converteron Pontevedra en escenario das súas andanzas. Máis tarde foi a quenda de Vivir sin permiso, que fixo que José Coronado e Álex González foran asiduos á nosa cidade. Pero, sen dúbida, foi a película La sombra de la ley, dirixida por Dani de la Torre, a que converteu á Boa Vila case nun dos seus protagonistas.
A estrea deste filme, rodado en diferentes escenarios de Pontevedra durante o verán de 2017, foi un dos principais eventos que nos deixa a crónica social deste ano. O Teatro Principal vestiu as súas mellores galas para acoller a premier da película, que trouxo á cidade aos seus principais actores, entre eles, Luís Tosar, Michelle Jenner ou Paco Tous.
En televisión, xunto ás series de Antena 3 e Telecinco, tamén se falou de Pontevedra en TVE. Foi coa exitosa participación de Ketty, unha cubana afincada na cidade, no concurso culinario Masterchef; co regreso de Xabi Fortes á "primeira liña", como presentador de Los desayunos ou con Julia Varela, de novo á fronte de Eurovisión.
Recorrente foi tamén a presenza de Roelio nas pantallas de todos os españois, no seu caso da man de David Broncano e o seu programa La resistencia, emitido en Movistar+, que fixo da mascota do Pontevedra CF unha diana frecuente para as súas corrosivas bromas.
2018 deixounos, xa na "vida real" historias case de película.
Así foi a voda de dous internos da prisión da Lama, coñecidos como os "Bonnie & Clyde" galegos, fóra das paredes do cárcere; a batalla de Alba García, unha moza de Poio á que se lle nega o acceso á Garda Civil por ser celiaca; o insólito empate que obrigou a repetir as eleccións no Liceo Casino; ou o regreso de 'O Gordo' da Lotería á cidade.
Como todos os anos, Pontevedra tamén despediu a cidadáns ilustres.
Foi o caso, entre outros, do párroco Luís Alcántara, do avogado Gonzalo Adrio, do empresario Manuel Durán Couto, de Suso Morlán, adestrador de David Cal; de Pedro García Limeses, ex presidente da Banda de Música de Pontevedra; de Francisco Lage, ex xefe de Bombeiros; de 'Pepe California', fundador das Rutas do Románico; ou de Mariano Rajoy Sobredo, presidente da Audiencia durante vinte anos e pai do ex presidente do Goberno.
As súas perdas foron moi sentidas, pero especialmente doloroso foi o falecemento da nena Nahir, coa que a cidade se volcou en numerosas ocasións para colaborar no custo do tratamento médico que necesitaba pola súa parálise cerebral. Con só seis anos de vida, o seu foi un exemplo constante de superación.
E no capítulo de despedidas engadimos, por último, o peche da discoteca Carabás, que tras case trinta anos de actividade, dixo adeus este ano, deixando algo orfos aos miles de pontevedreses que, nalgún momento da súa vida, convertérana en punto habitual de reunión cos amigos.