O Tempo

Galicia continuará durante o sábado baixo a influencia das altas presións, con circulación do nordés. Con esta situación, agárdanse bancos de néboa matinais en zonas de interior, que darán paso a ceos moi despexados en xeral, con máis nubes na Mariña. As temperaturas mínimas sufriron un lixeiro ascenso, mentres que as máximas non terán cambios significativos. Os ventos soprarán do nordés, frouxos en xeral, moderados no litoral.

O domingo seguiremos baixo dominio anticiclónico, con circulación do nordés moi marcada. Con isto, teremos os ceos con nubosidade de tipo alto durante a mañá, quedando os ceos moi despexados en xeral pola tarde, con nubes de estancamento na Mariña. As temperaturas experimentarán un lixeiro ascenso, con valores máximos moi suaves. Os ventos soprarán do nordés frouxos no interior, moderados no litoral, sendo fortes entre Bares e Fisterra.

O luns o anticiclón situarase sobre as Illas Británicas permitindo a entrada de aire cálido en Galicia desde o sur peninsular. Así, agárdase unha nova xornada de néboas en comarcas do interior, deixando os ceos moi despexados, con nubes de estancamento na Mariña. As temperaturas en ascenso, nas horas centrais do día quedarán en xeral por riba dos 20ºC. O vento soprará frouxo do leste-nordés, con intervalos fortes na metade norte.