O Pontevedra, obrigado a gañar o pechacancelas no "partido máis difícil de todos"
Por Manu Otero
O Pontevedra viaxa este sábado a Talavera para enfrontarse o domingo ás 12 horas ao último clasificado e ao bordo do descenso matemático nunha nova final pola permanencia en Primeira Federación.
Con todo, o técnico granate considera que é "o partido máis difícil de todos". Argumenta Juan Señor que "enfrontarse a un rival por baixo na táboa non é o habitual, pero non podes ver onde está o rival, hai que respectarlle e xogar as túas bazas".
Neste sentido, tampouco quere darlle maior importancia o preparador ás baixas en defensa que arrastra o Talavera. "Aínda que haxa xogadores que non son habituais, xogan e compiten moi ben", sostén o adestrador.
Tamén destacou Señor a presenza de afeccionados granates no Prado, que viaxarán na madrugada do domingo para estar á beira dos seus xogadores nunha cita tan transcendental. "Imos sentir arroupados. A min alégrame saber que imos ter as cores do Hai que Roelo no momento que marquemos un gol e consigamos a vitoria vai ser compartido con eles", valora.
Aínda así, o Pontevedra de Juan Señor deberá superar a barreira de conseguir sumar puntos fóra da casa. Ata o momento todos os partidos fóra de Pasarón cóntanse por derrota, pero o adestrador ve un partido "propicio e necesario" para romper esta estatística.
A única baixa confirmada polo bando granate é a de Luís Martínez, que sofre unha escordadura de xeonllo que lle dificultará disputar máis minutos de aquí a final de tempada. O resto do equipo está ao dispor de Juan Señor que terá que deixar xogadores fóra da convocatoria por decisión técnica "e dáme rabia".
Con todo e a pesar da escasa marxe de manobra, no vestiario granate conservan a esperanza e senten capacitados para "gañar a calquera rival e competir con garantías de vencer", remarca Señor pedindo "intensidade" e "respecto polo rival" para sumar tres puntos que poden achegar ao Pontevedra á salvación.
Relacionadas:
-
Un Pontevedra sen ambición naufraga en Talavera e deixa escapar o tren da permanencia (4-2)
Por Diego Espiño |
-
As lesións deixan o Talavera sen laterais para recibir o Pontevedra
Por Diego Espiño |
-
Brais Abelenda adéstrase con normalidade e apunta á 'final' de Talavera
Por Diego Espiño |
-
Organizan unha viaxe gratuíta en autobús para apoiar o Pontevedra en Talavera
Por Redacción |