Os defensas deciden o derbi entre Ribadumia e Arosa (0-2)
Por Ramiro Espiño
No derbi da necesidade o Arosa foi mellor e levou con xustiza os tres puntos sorprendendo ao Ribadumia na Senra. Dous goles dos dous defensas centrais arosistas, Rivas e Aitor Díaz, ambos de cabeza á saída de senllos corners botados por Adrián Camiño, decidiron un partido no que o propio Camiño e Changui fallaron desde os once metros un lanzamento de penalti.
Foron dous tempos moi diferentes. Máis nivelado o primeiro, con chegadas a ambas as áreas, ritmo elevado e frecuentes ocasións de perigo, e absolutamente controlado o segundo por un Arosa cómodo no campo, fronte a un Ribadumia sen ideas para impoñerse no centro do terreo e incapaz de achegarse con perigo nin unha soa vez á área visitante.
Os comezos do partido foron eléctricos, cos dous equipos pelexando con intensidade e buscando a meta rival. O primeiro en crear perigo foi o Ribadumia, cun bo lanzamento de Changui que obrigou a Jorge a intervir con acerto para desviar o disparo.
Era o minuto 10 de xogo e catro despois o Arosa, que gañaba metros grazas á súa superioridade na zona central do campo, tiña a súa primeira gran ocasión. Un balón interior para Rubén termina co dianteiro arosista no chan, agarrado de forma inocente por Rodri Silva. O árbitro, moi preto, non dubidou en sinalar o claro penalti, pero Adrián Camiño atopouse con Javi Sánchez, que adiviñou a intención e detivo o lanzamento do capitán visitante.
Esta acción pareceu dar ás ao Ribadumia, que protagonizou os seus mellores momentos no partido e puido adiantarse. Primeiro nun gran disparo de Hugo, minuto 18, que se foi ao traveseiro, e logo no segundo penalti da tarde. Esta vez foi Rivas quen de forma inocente leva por diante a Fran Matos, minuto 35. Era a quenda de Changui, especialista máximo, pero o veterano dianteiro, que non tivo a súa mellor tarde, mandou o disparo ao poste.
Aí practicamente acabouse o Ribadumia, vítima a medias da súa incapacidade para xerar xogo e dos seus graves fallos de marcaxe nas accións a balón parado. Xusto antes do descanso, no tempo engadido, chegaba o primeiro gol visitante. Un corner lanzado por Adrián Camiño rematábao Rivas de cabeza, ao bordo da área pequena e sen oposición.
Tras o descanso, un novo corner mal defendido pola zaga local deixou o partido resolto. Era o minuto 56 e de novo Camiño lanzou para que nesta ocasión o outro central visitante, Aitor Díaz, completamente só, remate de cabeza á rede.
O resto do partido ten un rápido resumo. Control total do Arosa, esperando unha contra que non chegou, e impotencia do Ribadumia, roto e sen ideas para xerar xogo nin ocasións de perigo. Un remate de Nando lixeiramente desviado (minuto 78) foi a única ocasión de relativo apuro visitante, ata que nos últimos minutos, con máis corazón que xogo, os de Sierra buscaron á desesperada a área rival, pero os de Piscis defendéronse sen abafos para terminar gañando con xustiza.
Con este resultado o Arosa segue mirando timidamente cara arriba, mentres o Ribadumia cae de novo a postos de descenso.
CD RIBADUMIA (0): Javi Sánchez; Rodri Silva (Agus, minuto 46), Bugallo, Aran, Óscar Río; Jon (Julio Rey, minuto 63), Paco (Mou, minuto 69); Hugo, Nando, Fran Matos; e Changui.
AROSA SC (2): Jorge Pérez; Fafú, Rivas, Aitor Díaz, Alfonso (Carballa, minuto 24); Óscar, Fran Fandiño; Eloy, Adrián Camiño, Rubén (Hugo Soto, minuto 79); e Alberto Cabanyes (Nacho, minuto 88).
Árbitro: Saúl López Parga (Lugo), auxiliado nas bandas por Gonzalo Gómez Lemos e Iván Manuel Mariño Rodríguez. Amoestou a Rodri Silva, Óscar Río, Jon, Hugo, Nando e Julio Rey, polo Ribadumia, e a Óscar, Rubén, Cardeñosa (no banco) e ao adestrador, Piscis, polo Arosa.
Goles: (0-1) Minuto 45+1: Rivas. (0-2) Minuto 56: Aitor Díaz.
Incidencias: Campo Municipal da Senra. Uns 600 espectadores.
Relacionadas:
-
O Arosa pon fin a dúas malas xornadas cun empate ante o Ourense (1-1)
Por Redacción |
-
Freada do Arosa que sae goleado de Redondela (3-0)
Por Redacción |
-
O Arosa tomba ao Barbadás (5-1) e engánchase á pelexa polo cuarto posto
Por Redacción |
-
O Ribadumia colle aire cunha goleada en Ribadeo (1-4)
Por Redacción |
-
O Ribadumia segue sumando e sorprende ao Boiro en Barraña (1-1)
Por Redacción |
-
Un Arosa de máis a menos termina perdendo na Lomba ante o Barco (1-2)
Por Redacción |
-
Javi Veloso chega cedido ao Arosa ata final de tempada
Por Redacción |