Piscis faise centenario co Arosa
Por Redacción
A Lomba acollerá o vindeiro domingo 4 de outubro (17:30 horas) un choque especial para o actual adestrador do Arosa, José Luís Uhía 'Piscis'.
O técnico arlequinado chegará ante o Choco á simbólica cifra de 100 partidos oficiais dirixindo ao club de Vilagarcía, superando ao seu antecesor, Lino González.
Piscis fíxose cargo do Arosa en febreiro de 2013 substituíndo a González, sumando esa tempada 17 partidos entre a liga e o play-off de ascenso a Terceira División. A esta cifra hai que engadir os 76 das dúas últimas tempadas en Terceira e as primeiras xornadas da actual.
Nos 70 anos de historia do club, Félix Carnero é o técnico con máis encontros oficiais (155), seguido de Edelmiro Lorenzo (150) e Antonio Castellanos (116), ao que Piscis podería superar na xornada 24 da presente campaña, o 7 de febreiro en Ribadumia.
No club que preside Manolo Abalo móstranse satisfeitos co traballo realizado ata agora polo preparador de Portonovo, co que esperan este ano dar un paso adiante para pelexar por clasificarse para o play-off de ascenso a Segunda B.
Polo momento, logo de seis xornadas de liga, o Arosa marcha na terceira praza con 11 puntos, os mesmos que o líder, o Deportivo B.