Indignación na Federación Galega pola exclusión de Carmen Gómez da lista para o Mundial Júnior
Por Diego Espiño
Creada e actualizada
Creada e actualizada
A decisión do director técnico da Federación Española de Triatlón, Iñaki Arenal, de non incluír Carmen Gómez Cortés e Uxío Abuin no equipo español que disputará a próxima fin de semana o Mundial en Edmonton, Canadá, levantou ampolas na Federación Galega.
Trátase dos campionatos do Mundo Júnior e Sub-23, que se disputan coincidindo coa Gran Final das Series Mundiais, e nos que ambos os dous deportistas lograran unha praza. Non obstante para sorpresa dos responsables galegos os seus deportistas foron excluídos da cita.
Paco Villanueva: "Din que Carmen é cadete e ten aínda moitos campionatos por diante, pero quítanlle o seu dereito"
No caso de Carmen Gómez, a pontevedresa lograra a clasificación grazas ao seu quinto posto no Europeo Júnior, o que "segundo ás normas outorgaba praza directa para o Mundial", explica o presidente da Federación Galega, Paco Villanueva.
Os responsables do equipo español apóianse en "escusas bastante peregrinas, como que xa competía en China e non tiña tempo a recuperar", explica Villanueva en relación aos Xogos Olímpicos da Xuventude, onde a lerezana logrou un meritorio noveno posto.
Pero Carmen, cuxa praza non foi cuberta con ningunha outra deportista española, quedou uns días en Nanjing pero, aseguran, podería ter acudido sen problema á cita de Edmonton.
Esta situación provocou unha queixa formal da Federación Galega, que se reuniu cos responsables da Española sen que, dez días despois, esta se pronunciase ao respecto, a pesar do compromiso adquirido polo dirixente desta, José Hidalgo.
O caso é similar para Uxío Abuín, que lograra praza para a competición Sub-23, pero que queda en Galicia "porque din que este ano non está forte", a pesar de finalizar oitavo no Campionato de Europa sub-23.
As queixas dos responsables galegos complétanse con Melina Alonso, triatleta que por ránking se clasificara para a proba das Series Mundiais en Estocolmo, celebrada a pasada fin de semana, e á que non puido acudir.
A Federación Española, segundo Paco Villanueva, alega tamén motivos económicos para adoptar estas decisións, obviando a opción de custear a viaxe dende a Federación Galega, un extremo ao que "nós estabamos dispostos, e incluo Uxío dixo que o pagaba el", conclúe o máximo dirixente do tríatlon galego.
Relacionadas:
-
Carmen Gómez arranca a súa tempada cun cuarto posto na Copa de Europa de tríatlon de Quarteira
Por Redacción |
-
Recepción no Concello a Carmen Gómez Cortés, a triatleta pontevedresa de maior proxección
Por Redacción |
-
Malestar no Super Froiz pola exclusión de ÿscar González Brea da lista para o Mundial sub-23
Por Alejandro Espiño |
-
Medalla de prata para Carmen Gómez nos relevos mixtos dos Xogos Olímpicos da Xuventude
Por Redacción |
-
Noveno posto para Carmen Gómez nos Xogos Olímpicos da Xuventude
Por Redacción |
-
Carmen Gómez, rumbo a Nanjing coa ilusión de brillar nos Xogos Olímpicos da Xuventude
Por Redacción |