'Aires galegos' soarán no convento de Santa Clara a través do piano de Iván Fernández
Por Redacción
O pianista vigués Iván Fernández será o protagonista do próximo concerto de 'Híbridas en Santa Clara', que se celebra na capela do convento. A cita está prevista para o venres 13 de maio a partir das 20.00 horas.
O músico interpretará ao piano obras de catro autores galegos: Xoán Montes, Andrés Gaos, Juan Durán e Rogelio Groba.
'Aires galegos' é o título do último álbum do intérprete e tamén deste recital no que se ofrecerá unha viaxe sonora por obras inspiradas na música tradicional de Galicia.
No programa figuran unha selección de Baladas Galegas, de Xoán Montes; as pezas 'Novos aires galegos' e 'Aires Galegos', de Andrés Gaos; a 'Fantasía sobre un tema popular' e tamén a 'Fantasía sobre O Galopín', obras de Juan Durán; ademais de 'Soatiña', peza de Rogelio Groba.
Segundo o músico esta selección forma parte dun conxunto de miniaturas inspiradas na música tradicional cheas de frescura e orixinalidade. Cada un destes autores ofrece a súa particular visión da música co costumismo de Gaos; o virtuosismo romántico de Durán; a reinterpretación musical de poemas, que ofrece Montes; e o vangardismo de Groba.
Iván Fernández ofrecerá unha interpretación rigorosa, froito dunha ampla traxectoria profesional, neste concerto con entrada libre ata completar a capacidade da capela do convento de Santa Clara, establecida en 155 persoas sentadas.
Relacionadas:
-
O alumnado de Goretti Domínguez inaugura o ciclo de piano de Híbridas
Por Mónica Patxot |
-
Composición clásica, jazz, flamenco e música electrónica nun novo ciclo de Híbridas co piano como protagonista
Por Redacción |
-
O ciclo de cine mudo con música en directo en Santa Clara comezará con "Nanuk, o esquimó"
Por Redacción |
-
Danza e un concerto de Abraham Cupeiro, a oferta de Híbridas en Santa Clara para a fin de semana
Por Redacción |
-
Así é "Híbridas en Santa Clara", o "agromar" do antigo convento como referente cultural
Por Alejandro Espiño & Mónica Patxot |