Case 15.000 plantas porán a 'guinda' á primeira fase da remodelación portuaria de Sanxenxo
Por Redacción
Ao longo do mes de novembro, colocaranse 14.691 plantas de especies diferentes na nova rampla axardinada que completará a primeira fase das obras de remodelación da zona portuaria de Sanxenxo. Estes traballos concluirán, segundo as previsións, o 1 de decembro.
O alcalde de Sanxenxo, Telmo Martín, visitou este mércores as obras acompañado membros da empresa adxudicataria dos traballos Oreco Balgón, comprobando que o pavimento da senda está practicamente concluído e só quedaría o axardinamento.
Esta primeira fase dará lugar a un novo espazo verde en pleno centro urbano, con 33 árbores (piñeiros e tamarices), 4.369 arbustos de oito variedades diferentes e un total de 10.289 plantas con especies autóctonas e diferentes momentos de floración ao longo do ano.
María Fandiño, gañadora do Premio Arquitectura 2021 do Consello Superior dos Colexios de Arquitectos de España, é a encargada do deseño do novo xardín, da selección das especies arbóreas e dos tempos de plantación.
A actuación ten un custo de 1,5 millóns de euros que, segundo lembrou Martín, páganse con diñeiro da empresa municipal Nauta Sanxenxo "sen que lle custe un euro aos veciños".
Con ela búscase "unir de forma amable a trama urbana e a zona portuaria convidando ao paseo e ao disfrute da vexetación", destacou o rexedor de Sanxenxo.
En canto á segunda fase destes traballos, que inclúe a remodelación do edificio de Capitanía e o resto de edificios portuarios, está previsto que se licite a principios de 2024.
En calquera caso, Telmo Martín destacou que "todo ten que estar rematado nesta lexislatura".