Moraña inviste nunha nova marquesiña e cobrecontedores
Por Redacción
O Concello de Moraña vén de reactivar os plans municipais de Embelecemento e de Mobilidade Segura coa dotación de novos cobrecontedores e marquesiñas grazas a un investimento de máis de 16.000 euros.
O alcalde de Moraña, Sito Gómez, anunciou que o Grupo de Desenvolvemento Rural (GDR) Salnés-Ulla-Umia concedeu unha achega de case 10.000 euros, cofinanciada co Fondo Europeo Agrícola de Desenvolvemento Rural, para a execución destas dúas iniciativas, que terán lugar durante as próximas semanas cando se cumprimenten os correspondentes requisitos administrativos.
En primeiro lugar, vanse instalar dous novos cobrecontedores en lugares que se concretarán nos vindeiros días, xa que estase a estudar a viabilidade técnica e a realizar a medición de espazos para determinar a colocación destas infraestruturas de ocultación dos recintos de depósitos de lixo.
"A nosa idea é estender os cubrecontedores por todo o concello, sempre que haxa dispoñibilidade técnica e espazo onde colocalos, porque o noso propósito é que Moraña sexa cada día un concello máis bonito", sinalou Sito Gómez, que lembrou que este plan de Embelecemento xa chegou con esta iniciativa a Santa Lucía, Alberguería ou O Covelo, entre moitos outros lugares.
Paralelamente, o Concello de Moraña tamén vai aproveitar esta achega do GDR para reimpulsar o plan de Mobilidade Segura de Moraña coa instalación dunha nova marquesiña no lugar do Castro, na parroquia de Rebón. Esta infraestrutura, elaborada en aceiro galvanizado e cun banco de madeira, fará que os tempos de agarda do autobús sexan máis confortabes e seguros nunha zona periférica do municipio.
Relacionadas:
-
O vicepresidente Rafa Domínguez presenta aos concellos beneficiarios o proxecto "Da túa man"
Por Redacción |
-
Os coidados "Porta a porta" da Xunta chegan aos morañeses maiores de 55 anos
Por Redacción |
-
Morre atropelada unha muller de 95 anos no casco urbano de Cuntis
Por Redacción |
-
O pavillón de Santa Lucía terá nova cuberta antes do inverno
Por Redacción |