Volven as protestas laborais para reclamar a Ambulancias Civera que cumpra os acordos co Sergas
Por María José Pita & Mónica Patxot & Anxo Lourido
Creada e actualizada
Creada e actualizada
Persoal de Ambulancias Civera concentrábase este martes diante da porta de consultas do Hospital Provincial durante unha hora para demandar que a empresa concesionaria do servizo de transporte programado (non urxente) da área sanitaria de Pontevedra - O Salnés cumpra cos acordos en materia laboral.
Alertan de que a empresa continúa incumprindo o contrato co SERGAS. Xabier Aboi, de FGAMT-CIG, acusa a Civera de que non estableceu as cinco cadeiras eléctricas previstas na concesión para que se poida atender os pacientes con dificultades para acceder ao seu domicilio. Segundo indica, Civera só conta con dúas cadeiras eléctricas, unha para a zona de Pontevedra e outra para Vilagarcía. "As outras tres non apareceron", alerta o representante sindical ao explicar que se trata de pacientes de idades avanzadas, enfermos e con dificultades de mobilidade que teñen que esperar a que unha das dúas cadeiras quede liberada para poder ser atendidos.
Indica tamén que non se entregou toda a roupa prevista aos traballadores no ano 2022 nin se lavan os uniformes; e que en case tres anos non se ofreceu un só curso de formación, unha das propostas realizadas pola empresa para obter máis puntos no concurso para facerse con este servizo. Ademais, Aboi engade que non se realizan recoñecementos médicos.
A estas deficiencias súmase que ao redor de trinta traballadores permanecen sen que se lles pague un festivo porque a empresa, que se xestiona desde Valencia, alega que na Comunidade Valenciana non se celebraba esta festividade. Aboi lembra que a empresa de ambulancias se rexe polo convenio galego.
Tampouco finalizaron as obras pendentes na base, de maneira que o persoal continúa contando cunha soa ducha e carece de espazo para lavar os pratos e utensilios que usan nas comidas. A estas deficiencias súmase a situación do servidor da empresa orixinando problemas informáticos na regulación dos horarios laborais ou das localizacións do persoal.
"O único que pretenden é aforrar, aforrar e aforrar", manifesta o sindicalista da CIG en contra da empresa concesionaria, á espera de que a Xunta de Galicia "diga algo efectivo porque non vale sancionar, xa que pagan e punto".
"Por que llo consisten a mes e pico de que termine o concurso?", pregunta Aboi, quen lembra que o conselleiro de Sanidade, Julio García Comesaña, prometeu que se convocará un novo concurso para este servizo a finais deste mes ou principios de novembro para toda Galicia.
Os traballadores piden ao SERGAS e á xerencia da área sanitaria que adopten medidas para, mentres non conclúe o novo curso, se garanta un servizo "minimamente decente" aos pacientes.
JOSÉ FLORES VISITA A BASE DE AMBULANCIAS CIVERA
Precisamente, nesta mesma xornada, José Flores, xerente da área sanitaria de Pontevedra-O Salnés, visitaba as instalacións da base operativaen onde se atopan as ambulancias Civera para comprobar "in situ" o estado en que se atopan.
Flores recoñeceu que non coñecía este espazo e, acompañado polo director de xestión e a directora de procesos, quería comprobar se cumpren cos requisitos establecidos no contrato da adxudicataria do servizo.
O xerente afirma que "se están a cumprir" e recoñece que a xunta de persoal trasladara queixas por incumprimentos dalgúns puntos recolleitos nas bases do concurso que xa orixinaran un conflito. En todo caso, insistiu en que "practicamente a totalidade estanse a cumprir" e só expuxo que a empresa admitiu problemas co uniformes pero "está a punto de efectuarse".
José Flores asegurou que a visita lles deixou "bo sabor de boca pero non vamos a relaxar" afirmando que a Xerencia manterá un control para garantir o cumprimento exhaustivo do contrato.
Relacionadas:
-
Continúa en pé a folga de Ambulancias Civera: pararán o mércores se non teñen "garantía por escrito" de solución
Por Natalia Puga & Mónica Patxot |
-
Convocan unha nova folga en Ambulancias Civera: "os compañeiros de coordinación conviven con ratas"
Por Anxo Lourido |
-
A Xunta inicia o proceso para a contratación do transporte sanitario urxente para a área de Pontevedra-O Salnés
Por Redacción |
-
Alertan de que o contrato das ambulancias do 061 en Pontevedra pode quedar deserto
Por Redacción |
-
O Sergas prepara un novo contrato para o servizo de ambulancias en Pontevedra e O Salnés
Por Oskar Viéitez |
-
Suspenden a folga en Ambulancias Civera
Por Anxo Lourido |
-
Reclaman no Parlamento de Galicia a rescisión do contrato de Sanidade con Ambulancias Civera
Por Redacción |
-
Persoal de Ambulancias Civera péchase no Hospital Montecelo para denunciar impagos do salario
Por Anxo Lourido | Creada e actualizada