Demandan á Consellería melloras urxentes nos centros educativos caldenses
Por Redacción
Logo de visitar os centros educativos de Caldas de Reis e de coñecer as diferentes demandas trasladadas polos equipos directivos e representantes das familias, o goberno municipal decidiu facer presión ante a Xunta para conseguir que se leven a cabo as obras necesarias para garantir a habitabilidade dos centros escolares.
O tenente de alcalde, Manuel Fariña, quere falar co conselleiro de Educación, Román Rodríguez para pedirlle que se instalen os módulos auxiliares que permitan a ampliación do comedor do CPI Alfonso VII.
Por outra banda, os técnicos municipais están elaborando un segundo informe sobre a situación na que se atopa a rede de tubaxes do CPI Alfonso VII, que hai anos que esgotaron a súa vida útil.
En canto ao CEIP de San Clemente, o Concello asegura que é "urxente" unha reforma integral da primeira planta do edificio que inclúa a renovación do falso teito de toda a planta, xa que se atopa nunha situación "moi precaria", así como a substitución das ventás e a carpintería exterior de aluminio, a mellora da cuberta do edificio e a renovación do solo de varias aulas.
Manuel Fariña asegura que "todos estes traballos son de carácter estrutural e por tanto quedan fóra das obrigas de mantemento e conservación que competen ao Concello".
No que respecta aos asuntos que si son competencia municipal, o concello levará a cabo nas vindeiras semanas o pintado de varias aulas e espazos, renovación de area nos areeiros dos patios, nivelación de firme dos accesos, posta a punto da iluminación, entre outros traballos.
Por último, o tenente de alcalde e o concelleiro de educación comprometéronse manter un estricto seguimento destes asuntos e a manter unha comunicación fluída tanto cos equipos directivos como coas familias para darlles cumprida información dos asuntos tratados na reunión.
Relacionadas:
-
Caldas urxe á Xunta a que presente o plan para ampliar o comedor do CPI Alfonso VII
Por Redacción |
-
"Ante os oídos xordos da Xunta" o Concello de Caldas acomete melloras no CEIP de San Clemente
Por Oskar Viéitez |
-
O Goberno local de Caldas lamenta o "desleixo" da Consellería de Educación cos centros educativos do concello
Por Redacción |
-
Cuntis convoca axudas para mercar material escolar
Por Redacción |
-
Avanzan as obras de mantemento nos centros escolares de Poio
Por Redacción |