A Festa do Codillo, a mil racións por hora
Por Redacción
Cátering Arelas despachou en menos dunha hora as mil racións de codillo estofado na festa de exaltación gastronómica celebrada este domingo na Alameda da Lama.
A festa contou coa presenza do director xeral de Gandaría, Agricultura e Industrias Agroalimentarias, José Balseiros, o director xeral de Desenvolvemento Rural da Consellería de Medio Rural, Miguel Pérez Dubois, o alcalde en funcións Jorge Canda, o tenente de alcalde, David Carrera, e membros da Corporación Municipal.
Ademais do popular codillo, os asistentes a esta xornada de exaltación gastronómica poideron adquirir produtos como queixo, mel, embutido, postres caseiros, produtos da horta, froita, entre outros. Tamén había un posto de polbeiro así como de comida rápida para aquelas persoas que quixeran optar por outras alternativas culinarias.
Unha hora antes da apertura do posto que dispensaba as racións de codillo, a Banda de Gaitas Os Catro Ventos ofreceu un concerto que foi moi aplaudido polo público presente. A sobremesa musical correu a cargo de Os Encerellados que animaron o evento co seu humor e o seu ritmo.
A venda anticipada de tickets posta en marcha pola organización fixo que a inmensa maioría dos comensais que se deron cita no evento dispuxesen xa da entrada que lles daba dereito a unha ración de codillo estofado acompañada do correspondente prato conmemorativo de barro, os cubertos, pan, servilleta e viño a demanda. Desta maneira a organización evitou que se formara unha cola destinada á retirada de tickets e habilitando varios espazos para que os operarios puidesen despachar ao mesmo tempo a máis persoas que se achegaban coa súa entrada xa abonada previamente para poder retirar a súa correspondente ración.
Tamén os establecementos hostaleiros situados nas inmediacións da Alameda da Lama serviron codillo estofado que gozou do gusto do público que preferiu escoller estes locais para participar na festa gastronómica. Ademáis estivo funcionando a pleno rendemento un bar ambulante, un pulpeiro e o público abarrotou os postos de empanadas, delicatessen, filloas, e outros produtos galegos de repostería que saciaron a demanda dos asistentes.
Esta xornada gastronómica rematou cun concerto, ás 20 horas, na propia Alameda protagonizado pola Banda de Música Municipal da Lama que interpretou varias pezas moi coñecidas do seu repertorio e que foron moi aplaudidas polo público presente.