Xa vai sendo hora de empezar a falar das fogueiras de San Xoán
Por Oskar Viéitez
Nos últimos días do mes de maio e co verán chamando á porta os concellos xa empezan coa preparación da primeira das grandes festas da tempada estival: San Xoán.
O Concello de Vilagarcía de Arousa é o primeiro en dar o paso e vén de publicar un bando informativo sobre os requisitos que se deben cumprir para obter o os permisos para a celebración das cachadas de San Xoán e San Pedro.
Como en anos anteriores, deberá solicitarse permiso tanto para realizar fogueiras, tanto privadas como por parte de colectivos, como para a organización de grelladas en vía pública por parte de establecementos hostaleiros.
Os interesados deberán solicitar a preceptiva autorización municipal antes do sábado 17 de xuño e a lista de permisos concedidos publicarase o día 23 no taboleiro de anuncios da sede electrónica do Concello, onde tamén se atopan os formularios de solicitude. A obtención do permiso implica a aceptación por parte dos solicitantes do cumprimento dunha serie de normas sobre seguridade e limpeza.
O bando informa dos requisitos de obrigado cumprimento por parte dos organizadores das cachadas e cos que se pretende garantir a seguridade nas celebracións. A fogueira terá un perímetro de seguridade de 6 metros de radio por cada metro da altura combustible, porase especial coidado de non situalas baixo tendidos eléctricos ou telefónicos, de que estea lonxe de zonas arboradas, así como de que nos arredores non exista ningún local no que se almacenen produtos inflamables.
Non se poderán acumular combustibles nos arredores das cachadas e tampouco se poderán queimar nelas materiais contaminantes ou perigosos, como pneumáticos, aerosois, etc...
Para garantir a seguridade e atallar posibles incidencias, deberá disporse de material para a extinción do lume, tal e como caldeiros con auga, area ou extintores, e os organizadores están obrigados a deixar completamente apagada a fogueira antes de marcharse, para o cal deberán empapala con auga. Ademais, con exceso de vento non se poderá prender a fogueira.
A maiores destas normas, as fogueiras autorizadas nas praias deberán cumprir tamén o requisito de instalarse respectando os 6 metros de servidume de paso dende a liña de preamar ou marea alta, tal como se recolle na ordenanza reguladora do uso das praias, e outros 6 metros de marxe respecto ao bordo do paseo marítimo.
No caso de que se teña intención de realizar a cachada na beirarrúa ou en calquera outro espazo público, ademais de cumprir os requisitos xa mencionados, deberá protexerse o pavimento con placas de ferro, area ou material similar que evite danalo. Ademais, os organizadores terán que deixar a zona limpa unha vez rematada a fogueira.
Relacionadas:
-
Cacharelas, sardiñas e verbenas para celebrar o San Xoán en Poio
Por Redacción |
-
Ata o 19 de xuño permanece aberto o prazo para solicitar permiso para montar fogueiras de San Xoán
Por Redacción |
-
Autorizadas as fogueiras nas praias de Silgar, Panadeira e Caneliñas en San Xoán
Por Redacción |
-
A partir do 8 de xuño, poderanse pedir os permisos para fogueiras e grelladas de San Xoán
Por Redacción |
-
A cidadanía de Bueu ten ata o 12 de xuño para solicitar autorización para facer fogueiras polo San Xoán
Por Redacción |
-
Un chispazo no tendido eléctrico provoca un incendio que deixa sen luz a parte de Poio
Por Redacción |