O Concello de Marín está a finalizar unha actuación de emerxencia que se desenvolve estes días no muro de contención da praia do Santo.

A estrutura, segundo informa o goberno local, presentaba unha serie de danos que aumentaron "enormemente" o risco de que se producise un derrubamento deste muro.

Unha vez detectado o problema, ante a posibilidade de perigo importante para as persoas usuarias do areal, o Concello decidiu iniciar os traballos para reparar os problemas que presentaba este elemento de contención e evitar que se incrementase o perigo.

Desde o goberno local manifestan que se aposta por un mantemento e coidado integral das praias para que se atopen no mellor estado posible ao tratarse dun elemento natural de gran valor e, ademais, moi utilizados durante estes meses pola veciñanza e as persoas que visitan o municipio.