O ORAL da Deputación pecha 2022 con 136 millóns de euros recadados
Por Oskar Viéitez
A Memoria do ORAL, o servizo da Deputación de Pontevedra encargado da xestión, inspección e recadación de tributos locais e outros ingresos de dereito público, sinala que este órgano pechou 2022 con 136 millóns de euros recadados e a cifra récord de máis de 560.000 atencións realizadas, sendo 82.000 presenciais e o resto telemáticas.
O ORAL tivo un volume de xestión en 2022 de 209,3 millóns de euros, cifra que inclúe as contías derivadas de valores pendentes de cobrar de anos anteriores.
O deputado de Economía e Facenda, Carlos Font, presentou este balance de xestión salientando as 42 novas competencias acadadas este ano "que representan la mitad de todas las conseguidas en el actual mandato, desde 2018"
Outros datos salientables son o 92% de cobros dos padróns xirados en 2022, as 32.000 novas domiciliacións ou o descenso en 21,4 millóns dos valores pendentes de cobro entre 2018 e 2022.
Carlos Font valorou que este datos, "muestran la eficacia de este servicio y la confianza que tienen tanto los concellos como las personas contribuyentes en nuestro servicio de recaudación".
Un total de 63 entidades locais, entre eles 54 concellos, teñen delegacións no ORAL.
Outros datos destacados nesta Menomira foron as 621.500 comunicacións emitidas por SMS e correo electrónico a través do servizo ‘ORAL Informa’, o aumento nun 37% en só tres anos dos pagos telemáticos, e tamén das domiciliacións que en 2022 representaron un 3,8% máis que en 2021.
Outras cuestións recollidas na memoria do ORAL son a tramitación de preto de 2.800 expedientes de procedementos de inspección (algo moi salientable xa que en 2018 só se realizaron 74), cunha porcentaxe de cobro do 94,4%, ou a renovación do convenio de colaboración coa Dirección Xeral do Catastro para realizar labores de actualización e mantemento catastral de 48 concellos.
Ademais, en 2022 o ORAL achegou liquidez aos concellos a través de anticipos a conta e liquidacións de ingresos parciais: 64,6 millóns de anticipos ordinarios (un 4,1% máis) e 1,8 millóns en anticipos extraordinarios, cun aumento global do 3% respecto a 2021.
O ORAL está formado por un cadro de persoal de 137 persoas das que 97 son funcionarias e 40 persoal laboral.