Os "Xogos de verán" chegan este luns a Lourido
Por Redacción
Lourido recupera este luns os Xogos de Verán, organizados pola Asociación Veciñal, Cultural e Deportiva Lourido, en colaboración coa Concellería de Deportes. A responsable deste departamento, Marga Caldas, deu a coñecer os detalles da programación, acompañada por representantes do colectivo organizador.
"Para nós é un gran motivo de ledicia poder presentar este evento, que conta con 26 anos de historia e que se celebrou por última vez no verán de 2019", apuntou Caldas Moreira, que explicou que as probas desenvolveranse desde o luns 25 ata o domingo 31.
As inscricións poderán realizarse a través da páxina web www.xogosdelourido.com, onde tamén se ofrece información detallada do amplo programa de actividades e dos horarios. Asemade, as reservas poden formularse chamando ao 606257171 ou enviando un correo electrónico á dirección clubfutbolbasepoio@gmail.com, no que deberán constar os datos dos integrantes de cada equipo.
Estas probas, todas de carácter gratuíto, destacan pola súa variedade. Así, haberá competicións de fútbol 6 base, así como volei praia, bici praia, pesca ou tenis praia. Todas as actividades terán lugar durante as tardes, a partires das 18.00 horas, a excepción da de pesca, que será o sábado 30 ás 10.00 horas. Ademais, non faltarán xogos tradicionais como a petanca, aros, a chave ou a carreira dos caramelos.
A música tamén será protagonista durante a fin de semana, cunha actuación de Javi Solla DJ ás 21.30 horas do sábado e outra a cargo da Agrupación Vides Novas, a modo de peche dos Xogos de Verán. Ademais, contémplase iniciativas pensadas para os máis cativos, como obradoiros de manualidades.
CONCURSO DE FOTOGRAFÍA FESTA DA AMEIXA
Por outra banda, o concelleiro de Festexos, Xosé Luís Martínez, informa de que o vindeiro luns, día 18 de xullo, abrirase o prazo para participar no Concurso de Fotografía Festa da Ameixa, que este ano chega á súa quinta edición. Os autores das instantáneas que reciban unha maior valoración por parte du xurado levaranse como premio vales en material fotográfico ou similar, valorados en 300, 200 e 100 euros.
Como xa é habitual, a temática das fotos versará sobre a Festa da Ameixa. O prazo de presentación permanecerá aberto ata o 9 de setembro.