Presentado o programa festivo e cultural de Cerdedo-Cotobade para o mes de xullo
Por Redacción
Presentado o amplo programa festivo e cultural que se levará a cabo durante o mes de xullo no Concello de Cerdedo-Cotobade. As actividades foron presentadas polo alcalde, Jorge Cubela, durante a mañá deste venres.
Cubela agradeceu e animou á veciñanza a participar de xeito activo nas actividades previstas e destacou que, en colaboración cos distintos colectivos veciñais, estanse ultimando as actividades lúdicas e festivas para o vindeiro mes de agosto, que tamén serán obxecto de publicacións divulgativas a través de trípticos, páxina web, redes sociais e cartelería, ao igual que sucede agora coa deste mes.
Unha das actuacións máis agardadas, despois de que tivera que ser aprazada pola choiva é a do músico galego Roi Casal que estará o día 15 de xullo na Praza do Concello, en Cerdedo co seu espectáculo 'Son galego, Son cubano'.
O día seguinte, o sábado 16, será o turno dos Trazantes de Tenorio, coa súa tradicional mostra que terá lugar no campo da festa da parroquia e, o domingo 17, actuará o mítico grupo galego A Roda, ás 22:00 horas en Cuspedriños que celebrará a Feira Agroalimentaria e tradicional.
O sábado 23, a adrenalina protagoniza a Baixada de Carrilanas en San Xurxo de Sacos coa participación daqueles 'tolos cos seus cacharros', dentro da disciplina de deportes de inercia onde se adquiren grandes velocidades e se pondera a pericia dos pilotos. Ese mesmo día tamén terá lugar o Día do Neno, con inchables, festa da escuma, xogos, etc. na praia fluvial de Cerdedo.
Para os días grandes de celebración das Festas do Ecce Home e da Virxe das Dores contarán coa participación do teatro na rúa de 'Riscando o ceo de Circo Chosco', ás 18:00 horas do día 29 de xullo na Praza da Igrexa, en Cerdedo, mentres que o domingo 31 actuará a Banda de Música de Cerdedo, ás 20:00 horas na Praza do Concello. Pechará o programa festivo o concerto do cantante galego Manoele de Felisa, ás 22:00 horas tamén na mesma praza en Cerdedo.
Relacionadas:
-
San Xusto aposta pola velocidade coa súa carreira de carrilanas
Por Cristina Saiz |
-
As carrilanas volven á Carballeira de San Xusto
Por Redacción |
-
A Feira Agroalimentaria de Cuspedriños despachou máis de 6.000 racións na degustación gratuíta de carnes autóctonas
Por Redacción |
-
Roi Casal recupera este venres 15 de xullo o seu concerto aprazado en Cerdedo
Por Redacción |
-
Grupos de Galicia e Portugal participarán na undécima mostra dos Trazantes de Tenorio
Por Redacción |