Este mércores 8 de xuño celébrase o Día Mundial dos Océanos, co propósito de informar sobre o impacto dos humanos no medio mariño, desenvolver un movemento mundial de apoio e unir á poboación nun proxecto para a xestión sostible dos nosos mares.

Coincidindo esta data, a Autoridade Portuaria de Marín e a frota pesqueira lembran o seu compromiso coa retirada de lixo mariño das nosas costas. Froito desta colaboración, no que vai de ano retiráronse xa 11.440 quilos de lixo procedente do litoral e fondos mariños.

O Porto leva implicado desde 2014 no empeño de manter limpas as costas e así se sacaron do mar preto de 161.000 quilos de lixo que son traídas a terra polos barcos que faenan no litoral. A Autoridade Portuaria recibe estes residuos, clasifícaos e trasládaos a un  compactador para posteriormente trasladalos a un xestor autorizado de residuos.

Esta actividade desde 2014 é continuidade de proxectos anteriores nos que participou o Porto de Marín como "Nada pola Borda" e "Pescal", que foron accións temporais pero que a Autoridade Portuaria decidiu manter en colaboración cos armadores de pesca de Marín e a empresa Casercan, reforzando así o seu compromiso coa pesca sostible e responsable.