![](/web/cache/scene/uploads/fotos/foto/b00/_S7QytKoutjK3UsovKMnMzytWsi62MgJyq/Lzc52L8gt0zCwMdI_/_wNDHSSU/NKUot0SvILlKxrAQ==_/6229fbe5c4-yoya-03.jpg)
© PontevedraViva
'Mulleres da vila' dá relevancia ás empresarias do comercio local
![Anxo](/web/cache/scene/uploads/xornalistas/foto/022/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/6683d39821-a.jpg)
Por Anxo Lourido
![](/web/cache/scene/uploads/fotos/foto/0ee/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/6229fba784-yoya-01.jpg)
© PontevedraViva
![](/web/cache/scene/uploads/fotos/foto/fc8/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/6229fc23d4-yoya-04.jpg)
© PontevedraViva
![](/web/cache/scene/uploads/fotos/foto/962/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/6229fcdf90-yoya-05.jpg)
© Concello de Pontevedra
![](/web/cache/scene/uploads/fotos/foto/dd0/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/6229fd01df-yoya-06.jpg)
© Concello de Pontevedra
Ao longo dun mes desenvólvese en 15 comercios de Pontevedra unha campaña denominada 'Mulleres da Vila', a segunda edición dun proxecto que quere dar protagonismo a emprendedoras de Pontevedra con motivo da celebración do 8M.
É o caso de Lupe Boullosa, a encargada da Mercería Lembranzas na pasarela José Adrio. Alí recibía esta xoves a visita da concelleira de Igualdade, Yoya Blanco, acompañada pola promotora desta iniciativa, Patricia Maquieira. A veterana empresaria amosábase moi orgullosa da súa imaxe, que forma parte da campaña.
Yoya Blanco sinalaba que Lupe representa ás mulleres emprendedoras que levan moitos anos á fronte dun comercio, compatibilizando o seu traballo con actividades familiares. A concelleira destacaba a importancia deste tipo de negocios locais, aos que se pode chamar para pedir aquilo que se necesita expresamente, algo que "non dá ningunha cadea".
Lupe Boullosa leva 33 anos á fronte da mercería. Viu a evolución da zona, desde que estaba sen cubrir a vía e "había ratas por todas partes" ata a actualidade coa pasarela. Ela amósase feliz coa foto que estes días adorna o escaparate do seu negocio e sinala que tanto a realización da foto como do vídeo que acompaña o proxecto foi moi emotiva: "ata botamos unha bágoa lembrando algunha cousa. Moitas vivencias hai aquí".
Recoñece que o mercado da internet está a asoballar ao pequeno comercio pero móstrase optimista porque "ás pezas da internet tamén se lles cae un botón ou se lles rompe unha cremalleira e para iso estamos nós".
Nuria Nerga, responsable dun Salón de Uñas na rúa Pintor Laxeiro, tamén se mostraba encantada pola iniciativa e así llo transmitía á concelleira. A nova empresaria fai un chamamento ás mulleres para que sempre estean a se formar para poder sobrevivir no mercado empresarial. Ademais, animaba ás emprendedoras a "perseverar" e a "seguir loitando" para permanecer.
A fotógrafa Patricia Maquieira, promotora deste proxecto, sinalaba que esta iniciativa é unha homenaxe ás mulleres empresarias, para tratar as súas historias e ofrecelas nun vídeo no que narran as súas vivencias persoais, mostran as súas calidades e ofrecen consellos a outras mulleres que queiran emprender unha actividade empresarial. Para esta proposta seleccionáronse tanto emprendedoras veteranas como mozas e de diferentes sectores dentro do comercio local.
Relacionadas:
-
VIDEO.- Quince 'Mulleres da vila' falan das súas experiencias como empresarias ou emprendedoras
Por Redacción |
-
Quince 'Mulleres da Vila' para visibilizar e homenaxear as emprendedoras de Pontevedra
Por Redacción |
-
'Mulleres' reivindican a súa loita na programación para o 8M
Por Raquel Currás Martínez |