Regresa a Andaina de Montes e Praias para axudar a Asociación contra o Cancro
Por Redacción
Este 2022 volve unha cita deportiva e solidaria que conta con moito apoio en Marín. Este mércores presentábase a VII Andaina de Montes e Praias, despois de dous anos sen poder celebrarse debido á pandemia. A cita será o domingo 6 de marzo, con saída ás 09.00 horas da Alameda Rosalía de Castro.
A proba foi presentada por José Francisco Gil Dopazo, representante do Club de Montañismo Xesteiras; a concelleira de Turismo, Cristina Acuña; e a presidenta da Asociación contra o Cancro (AECC) de Marín, Emilia Rey Parada.
Este ano establécense dúas modalidades para as persoas que queiran participar. Por unha banda desenvólvese a andaina popular, de 15 quilómetros; e tamén unha andaina deportiva de 25 km. O segundo percorrido, que forma parte da liga Nacional de Sendeirismo, é máis duro e está pensada para aqueles participantes afeitos a camiñar polo monte, segundo explico José Francisco Gil. Trátase dunha proba federada pero aberta a outras persoas non federadas.
Nesta edición tamén se cambiou o roteiro nun 90% para motivar a persoas que participasen outros anos e descubran novos espazos, segundo a organización. Está previsto que percorran puntos emblemáticos que unen Marín, Vilaboa e Moaña como o Lago Castiñeiras, as fervenzas do río Neibó ou as praias da vila.
As inscricións atópanse abertas ata o día 1 de marzo a través desta ligazón. O prezo para apuntarse é de cinco euros, que serán doados para apoiar á Asociación contra o Cancro de Marín. Emilia Rey Parada explicou que esta proba permite facer visible todo o traballo que realiza esta organización.
A celebración coincidirá co Bolo do Pote, que organiza a asociación Pousos da Area e que estará aberto para todas aquelas persoas que queiran gozar deste prato típico destas datas de Entroido.
Relacionadas:
-
A solidariedade e 750 persoas, protagonistas na oitava edición da Andaina Montes e Praias
Por Álvaro Arosa Barco |
-
Posta a punto para a Ruta de Montes e Praias de Marín o 26 de febreiro
Por Redacción |
-
A Andaina Montes e Praias recada 3.000 euros para a AECC de Marín
Por Redacción |
-
O 'bolo do pote' quenta os estómagos de centos de marinenses
Por Redacción |