Os ecoperegrinos logran repoboar Monte Vilar con máis de 600 carballos
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
A última edición da campaña Camiño da Reciclaxe, na que colaboran desde o ano 2016 Xunta e Ecoembes para implicar aos peregrinos na correcta separación dos residuos nas diferentes rutas a Santiago, permitiu plantar este venres máis de 600 árbores autóctonas en Cerdedo-Cotobade.
A conselleira de Medio Ambiente, Territorio e Vivenda, Ángeles Vázquez, acompañada pola directora da Axencia de Turismo de Galicia, Nava Castro, o director de xestión autonómica e local de Ecoembes, Ángel Hervella, e o alcalde, Jorge Cubela, participou nos traballos de plantación, que permitiron repoboar con exemplares de carballo autóctono unha parcela de 1 hectárea localizada no Monte Vilar.
Tras salientar que entre os meses de xuño e setembro de 2021 se recolleron case 117 toneladas de envases nos contedores amarelos e azuis instalados ao longo do Camiño, Ángeles Vázquez subliñou que a importancia da campaña radica non só nas notables cifras de recollida que se rexistran cada ano, senón en iniciativas "cun impacto medioambiental tan positivo" como a plantación realizada hoxe en Cerdedo-Cotobade.
Así, lembrou que o ano pasado se animou ás persoas que fan o Camiño de Santiago a cubrir unha Compostela moi particular para acreditar o seu compromiso coa reciclaxe e a loita contra o lixo. Por cada fotografía dunha Compostela selada en tres albergues subida ás redes sociais, a Xunta e Ecoembes comprometéronse a plantar unha árbore, o que significa que o ano pasado en Galicia houbo máis de 600 ecoperegrinos.
Camiño da Reciclaxe volverá poñerse en marcha este verán. Concretamente, está previsto que no mes de xuño os albergues se equipen de novo con todas as ferramentas e materiais necesarios para facilitar a reciclaxe e evitar que a basuraleza chegue ao Camiño.
Relacionadas:
-
Os "ecoperegrinos" propician a plantación de 625 árbores autóctonas nunha hectárea de bosque en Caldas de Reis
Por Oskar Viéitez |
-
Retiran plásticos e residuos das praias de Baltar e A Lanzada
Por Redacción |
-
Xa está arranxada a rede de pluviais no Camiño do Outeiro, na parroquia de Quireza
Por Redacción |