Caldas estuda a demanda de vivenda pública para impulsar novas promocións
Por Redacción
O concelleiro de Medio Ambiente, Obras e Infraestruturas do Concello de Caldas de Reis, Manuel González, informou hoxe do inicio dun “estudo da demanda de vivenda protexida no municipio para poder adecuar as posibles novas promocións públicas de vivenda ás necesidades existentes e á demanda real e concreta da veciñanza de Caldas”.
Deste xeito, o Concello pon á disposición das persoas interesadas o teléfono 647 574 316 para solicitar cita previa coa Oficina da Área de Rehabilitación Integral (ARI) que recollerá as demandas da veciñanza en materia de vivenda. Tamén pode solicitarse a cita previa por email: ari@caldasdereis.com. Esta campaña informativa desenvolverase ata finais do mes de marzo.
Neste proceso impulsarase a inscrición das persoas interesadas no Rexistro Único de Demandantes de Vivenda de Galicia, de carácter totalmente gratuito, requisito imprescindible para poder acceder a unha vivenda das futuras promocións de públicas. Este Rexistro é un instrumento do IGVS para a adxudicación de vivendas, respectando a capacidade de elección dos solicitantes e garantindo a igualdade de posibilidades no acceso ás vivendas dos demandantes inscritos. En base a esta información o Concello poderá adecuar a súa programación de vivenda protexida á demanda real existente.
No momento de inscribirse no Rexistro os demandantes deberán acreditar o cumprimento dos requisitos necesarios para ser titular dunha vivenda protexida ou acceder a unha vivenda con axudas públicas, xa sexa en réxime de compra, aluguer, ou, de ser o caso, aluguer con opción de compra.
Ao mesmo tempo, o Concello abre unha nova campaña informativa das diversas axudas públicas en materia de vivenda que se poden solicitar actualmente, tanto na zona ARI, como nas parroquias polas que pasa o Camiño de Santiago, e noutros casos no conxunto do municipio. Estas axudas están contempladas maioritariamente no Plan Estatal de Vivenda e son xestionadas a través do IGVS. Financian obras de rehabilitación, mantemento, mellora da eficiencia enerxética e a accesibilidade así como axudas para a adquisición de vivenda no centro histórico de Caldas e de aluguer.
O alcalde, Juan Manuel Rey, convida á veciñanza “a utilizar este servizo de información e asesoramento en materia de vivenda da oficina da ARI, e a aproveitar as axudas e subvencións dispoñibles, destacando o compromiso do equipo de goberno do Concello en impulsar novas promocións de vivendas protexidas adecuadas ás persoas que as necesitan”.
Relacionadas:
-
A oficina da ARI de Caldas de Reis atendeu 350 consultas este ano
Por Redacción |
-
A Oficina da ARI de Caldas tramita máis de 100 axudas a familias para a rehabilitación, adquisición e aluguer de vivendas
Por Redacción |
-
Convocadas novas subvencións da ARI de Caldas de Reis
Por Redacción |
-
50 vivendas de Caldas de Reis incorpóranse ao programa de compostaxe doméstica de Sogama
Por Redacción |
-
O Estado elaborará en 2022 o estudo para a variante oeste de Caldas
Por Redacción |
-
Caldas rexistra 55 solicitudes de subvencións para rehabilitar edificios e vivendas
Por Redacción |