A "batea en terra" da Praza do Mar executarase en tres fases e custará 8 millóns
Por Redacción
Ata os 7,8 millóns de euros elevarase finalmente o custo da remodelación da Praza do Mar, coa execución do proxecto denominado "batea en terra" nas inmediacións do porto deportivo de Sanxenxo.
A actuación, á que Nauta Sanxenxo deu a súa autorización para que salga a contratación, executarase en tres fases, seguindo a proposta gañadora do concurso de ideas.
A primeira fase centrarase na creación dun noiro axardinado con especies autóctonas que comunicará a Praza dos Barcos coa Praza do Mar de forma accesible e eliminando o corte brusco e pendente que actualmente supón a bancada.
Desta forma, prepárase xa a praza como miradoiro, pensada para utilizar todos os días do ano, con choiva e con sol, capaz de mellorar a calidade urbana e as relacións sociais.
Nesta primeira, fase contémplase a creación dun paso rodado polo interior do estacionamento público para atender as necesidades dos portos pesqueiro e deportivo tras a eliminación do actual acceso.
O reforzo da estrutura que soportará o umbráculo tamén se acometerá nesta fase.
A segunda centrarase na remodelación do edificio de Capitanía Marítima que no proxecto presentado ao concurso de ideas exponse desde un dobre punto de vista.
Por unha banda, utilizarase a estrutura existente sobre a que se construirá unha cuberta única e continua e, doutra banda, unha pérgola para unificar o conxunto.
A mellora contempla tamén medidas de eficiencia enerxética coa colocación de paneis solares que non serán percibidos nin desde a cidade nin desde o porto.
Na terceira fase acometerase o umbráculo construído en madeira galega. Será un recinto teitado, moi luminoso, con paredes acristaladas e suxeitado por catro grandes piares.
A idea é que teña un efecto espello que permita reflectir a ría, mentres que, no interior, ofrecerá panorámicas do litoral. Ocupará o 25% da superficie da actual praza e servirá para a celebración de actos culturais, deportivos, feiras e congresos.
Está pensado para que sexa un recinto flexible, o que permitirá o seu uso en calquera época do ano e dotará a Sanxenxo dunha estrutura con máis capacidade para albergar eventos.
Relacionadas:
-
A reconversión do ámbito portuario nunha 'batea en terra' comezará tras a Semana Santa
Por Redacción |
-
A primeira fase da 'Batea en terra' roldará os 1,5 millóns de euros e terá un prazo de execución de 9 meses
Por Oskar Viéitez |
-
Luz verde ao expediente de contratación da primeira fase de "Batea en terra"
Por Redacción |
-
Nauta quere saber canto lle custará a conexión axardinada entre as prazas dos Barcos e do Mar
Por Redacción |
-
Nauta Sanxenxo dá luz verde á remodelación da zona portuaria e da Praza do Mar
Por Oskar Viéitez |
-
Sanxenxo opta por unha 'batea en terra' para a futura Praza do Mar
Por Redacción |