Numerosa concentración desenvolvíase na tarde do xoves diante do Concello de Marín mentres no interior do edificio se desenvolvía o pleno municipal da Corporación.

A Plataforma pola Defensa  do Centro de Saúde de Seixo, conformada por 18 colectivos de Santomé de Piñeiro, O Campo, Ardán e Seixo, convocaba esta protesta para manifestar o seu rexeitamento aos recortes na atención sanitaria. Queren presionar para que se contrate persoal por parte da Xunta para dotar de persoal ao Centro de Saúde desta parroquia marinense.

Os manifestantes utilizaron proclamas como "Ramallo escoita o pobo está en loita", "sanidade, pública e de calidade", "non aos recortes no Centro de Saúde" y "os do rural, tamén temos dereitos". Na concentración tamén se atopaban familias da escola Nosa Señora do Carme onde está previsto que leven a cabo recortes de persoal educativo a partir do mes de setembro.

Dous integrantes da Plataforma, Nina Santos, presidenta da asociación O Tombo de Ardán e a portavoz Iria Aboi, da Asemblea Veciñal dá Torre, interviñeron no pleno alertando que o Centro de Saúde de Seixo quedarán con catro horas con consulta de médico para unha soa cota de pacientes, cando antes atopábanse dous profesionais a tempo completo para dúas cotas.

Lembraron que o Centro de Saúde de Marín presenta longas colas para solicitar citas médicas e denuncian que non se cobre ao persoal de vacacións en especialidades como pediatría.

O goberno municipal non aprobou a moción veciñal para rexeitar os recortes. Ante esta situación, desde o colectivo anuncian novas protestas e estudan a opción de acudir aos tribunais de xustiza.

A partir do luns 16, integrantes da Plataforma acudirán ao Centro de Saúde de Seixo a partir das 09.30 horas para axudar a aqueles usuarios que queiran poñer reclamacións polos recortes que sofre este consultorio.