Estudantes de Fisioterapia e Publicidade colaboran co II Torneo Internacional Júnior de Tenis
Por Redacción
O II Torneo Internacional de Tenis de Pontevedra contará coa axuda de 24 alumnos da Unidade de Voluntariado da Facultade de Fisioterapia e dous estudantes do grao en Publicidade e Relacións Públicas do campus pontevedrés.
Casino Mercantil, organizador do evento, e Universidade de Vigo, asinaron un acordo de colaboración para que os futuros fisioterapeutas poidan aquirir experiencia axudando na recuperación dos deportistas participantes, mentres as dúas alumnas de Publicidade e Relacións Públicas seleccionadas se farán cargo das tarefas de comunicación do torneo e o protocolo durante as xornadas de competición.
O torneo, no que participarán 120 tenistas de 20 países diferentes do 15 ao 20 de outubro, disputarase nas instalacións do Casino Mercantil.
A relación entre ambas as dúas entidades prolongarase en diante con novos eventos nos que o Mercantil, segundo o seu presidente Roberto Vega, espera contar "co apoio incondicional do Campus de Pontevedra".