Turismo de Pontevedra inicia esta fin de semana as visitas guiadas polo centro histórico
Por Redacción
Turismo de Pontevedra poñerá en marcha esta fin de semana as visitas guiadas polo centro histórico da cidade, que a partir do día 24 realizaranse de forma diaria. Ademais, a próxima semana abrirá o prazo de reservas para participar nas visitas nocturnas ás pontes sobre o Lérez e para a realización dunha etapa do Camiño Portugués a Santiago.
A concelleira de Promoción Económica, Yoya Blanco, animou a "todo o mundo a inscribirse nestas actividades, xa que, se ben existen moitas formas de coñecer unha cidade, percorrela cun guía pode ofrecernos unha perspectiva moito máis completa", dixo durante a presentación destas actividades.
As visitas, que cumprirán con todas as medidas anticovid, terán unha duración aproximada dunha hora e 45 minutos nos que se dará a coñecer todo tipo de elementos culturais, históricos, monumentais, gastronómicos e festivos.
Os guias farán especial fincapé nas lendas e anécdotas da cidade e inclúe acceso ao interior de emblemáticos edificios como as Ruínas de Santo Domingo, o Santuario da Virxe Peregrina, a igrexa de San Bartolomeu ou a Basílica de Santa María.
As visitas partirán do punto de información turística situado na planta baixa do consistorio cun mínimo de 5 persoas. A tarifa xeral é de 5 euros por persoa, pero os parados, estudantes, xubilados, pontevedreses e familias numerosas só terán que pagar 3 euros. Ademais son gratuítas para menores de 12 anos.
Entre o 24 de xuño e o 14 de setembro desenvolveranse estas visitas ás 11.30 e ás 18.30 horas de luns a sábado. Mentres que os domingos e festivos só haberá unha ás 11.30 horas. A partir da segunda quincena de setembro a saída da tarde adiantarase ás 17.30 horas.
Ademais, os fillos con idades comprendidas entre os 5 e 12 anos daquelas persoas que utilicen este servizo durante os meses de xullo e agosto poderán participar nun taller gratuíto que se realizará só durante a fin de semana.
O prezo das visitas nocturnas, que comezarán a partir do 15 de xuño, terán un prezo xeral de 8 euros e un reducido de 5 euros. Levaranse a cabo os venres e sábados a partir das 22.30 horas sempre que haxa un mínimo de 5 participantes. Será un roteiro de hora e media con saída desde o Mercado de Abastos para, a través das pontes, percorrer a historia e orixe de Pontevedra.
Tamén se abrirá o 15 de xuño a reserva de prazas para realizar un tramo do Camiño de Santiago en compañía dos guias de Turismo de Pontevedra durante os meses de xullo, agosto e setembro. A actividade consiste en camiñar un tramo de 11 quilómetros desde Arcade ata entrar na cidade cruzando a ponte de Ponte Sampaio, pola antiga calzada romana da Canicouva e pola riberal do río Gafos.
Estas saídas organizaranse todos os venres ás 8.45 horas entre o 1 de xullo e o 15 de setembro cunha tarifa xeral de 12 euros e unha reducida de 9 euros.
Relacionadas:
-
Xoves de verán para coñecer con detalle as Ruínas de San Domingos
Por Redacción |
-
'Atrévete a pensar' ofrece un roteiro para descubrir os espazos agochados da cidade
Por Cristina Saiz & María José Pita |
-
O Museo invita a visitas guiadas gratuítas os domingos ao mediodía
Por Redacción |
-
Unha visita para descubrir os escuros segredos da Pontevedra máis descoñecida
Por Oskar Viéitez |