A Deputación capta 2,1 millóns de euros de financiación europea para proxectos en Poio, Portas, Vilanova e Vilagarcía
Por Oskar Viéitez
A presidenta da Deputación de Pontevedra, Carmela Silva compareceu este venres en rolda de prensa para anunciar a captación de 2,1 millóns de euros de fondos europeos para financiar dous proxectos provinciais centrados na mellora da eficiencia enerxética e a mobilidade sostible. "Son recursos que, sumados aos nosos, permiten unha gran transformación da provincia", valorou.
Cando o Goberno provincial presentou os orzamentos da institución para este exercicio 2021 xa anunciou a súa intención de conseguir recursos de fondos europeos para "promover a transición ecolóxica" e para iso aseguráronse de que "todos os proxectos que estabamos desenvolvendo cumprían con todos os obxectivos, medidas e as pancas que está a promover a Unión Europea e o Goberno do Estado".
Os primeiros froitos empezaron a chegar, segundo confirmou a presidenta provincial, coa captación de recursos por parte destes fondos europeos, "chegan os primeiros e estamos convencidas de que chegarán moitos máis", engadiu.
Concretamente, obtivéronse financiamento para un proxecto de iluminación exterior sostible nos concellos de Portas, Valga, Vilanova e Vilagarcía, o que "permitirá un gran aforro enerxético". O investimento era de 929.488 euros e o Instituto para a Diversificación e Aforro da Enerxía ( IDAE) vai financiar 743.590 euros. Con este proxecto, substituiranse máis de 2.000 luminarias por leds de última xeración e elevada eficiencia que supoñerán un aforro enerxético medio estimado do 78% nos catro concellos.
O IDAE confirmou tamén unha achega de 1.400.045 euros para o proxecto de redución da pegada de carbono na mellora da mobilidade peonil na estrada EP-0601 Portosanto-Campelo en Poio, que se ía a financiar con fondos propios cun investimento de 1.750.056 euros.
O proxecto, que se estende entre a confluencia das rúas Pai Avelino e Costa en Campelo ata a intersección coa avenida Peirao Besada, vai renovar a infraestrutura por completo, recuperando o espazo público para as persoas de maneira sostible e inclusiva.
Carmela Silva celebrou o apoio do IDAE ás iniciativas provinciais que está a desenvolver a Deputación, "tendo en conta, ademais, que coa chegada destes recursos europeos, poderemos destinar boa parte do financiamento propio previsto ao impulso de novas actuacións".
Relacionadas:
-
Compromiso da Deputación para modificar a reforma de Campelo atendendo ás peticións veciñais
Por Redacción & Anxo Lourido |
-
Carmela Silva reivindica o protagonismo das entidades locais nos fondos europeos
Por Oskar Viéitez |
-
A mellora da eficiencia enerxética da Azucreira de Portas chega á Galiña Azul e ao centro de día
Por Redacción |
-
Unha nova axuda do IDAE para renovar o alumeado en Barro, Bueu e Caldas
Por Redacción |
-
O Grove e Cambados reciben fondos europeos a través da Deputación para renovar a súa iluminación
Por Redacción |