Contratan un arqueólogo para facer un informe da obra do cruzamento de Benito Corbal con Daniel de la Sota
Por Oskar Viéitez
A Xunta de Goberno do Concello de Pontevedra aprobou este luns a contratación polo procedemento de emerxencia dun informe arqueolóxico das obras que se están realizando no cruzamento das rúas Benito Corbal con Daniel de la Sota e Cobián Roffignac.
Segundo explicou a portavoz do Goberno local, Anabel Gulías, o Concello vai acometer neste punto unha actuación de reforma integral, posto que se incluirá a renovación completa da rede de saneamento nese tramo. Esta decisión vén motivada, segundo explicou, pola necesidade de solventar o deteriroro dun pozo da rede de saneamento que estaba a producir filtracións e deteriorando toda a área ao seu arredor.
Será contratado para este control arqueolóxico Diego Piay Augusto, por un importe de 1.452 euros. A portavoz municipal quixo deixar claro que este arqueólogo "non ten nada que ver co concelleiro Alberto Oubiña Piay por si alguén ten algunha dúbida".
Este control arqueolóxico é un requisito necesario antes de proceder a renovar a rede de saneamento para solventar esta incidencia detectada durante as obras de demolición do actual pavimento.
O Concello acometerá unha intervención que transformará o actual cruzamento nunha "praza circular que funcione como un espazo de estancia, de preferencia peonil e de alta calidade urbana", substituíndo o actual asfalto vermello por formigón puído confinado entre bandas de pedra.
Neste sentido, utilizaranse solucións xa probadas noutras intervencións da cidade como na cabeceira norte da ponte do Burgo, e o uso de bordillos circulares como por exemplo na praza do cruce da rúa da Seca con Casimiro Gómez e Fernando Olmedo.
Relacionadas:
-
O PP considera un exemplo de "feísmo" a reforma do cruzamento de Benito Corbal e Daniel de la Sota
Por Redacción |
-
Abren ao paso peonil o novo cruzamento de Benito Corbal con Daniel de la Sota
-
A aparición dunha poza en Daniel de la Sota obriga a unha reforma da rede de saneamento na rúa
Por Mónica Patxot & Anxo Lourido |
-
O mércores 27 comezan as obras para crear a praza circular entre Benito Corbal, Daniel de la Sota e Cobián Roffignac
Por Redacción |