"Ata máis ver", a iniciativa de Poio para aliviar a soidade dos seus maiores
Por Manu Otero
No Concello de Poio están censadas 560 persoas maiores de 65 anos que viven soas. Co obxectivo de aliviar os efectos desa soidade non desexada que cada día afecta a máis anciáns, a concellería de Servizos Sociais de Poio pon en marcha o programa "Ata máis ver", unha iniciativa consistente en facer chamadas periódicas por teléfono a quen o necesite "para dicir nada máis e nada menos que ola" e conversar un intre con elas, explican desde a Casa Rosada.
A iniciativa poñerase en marcha este mesmo mércores co inicio da repartición de cartas a todas as persoas deste colectivo. Nelas explican o funcionamento do programa e inclúen unha tarxeta co número de teléfono da Casa Rosada para chamar e inscribirse no sistema. Unha vez feito este paso, será o persoal de Servizos Sociais o que contacte co usuario para fixar un calendario de chamadas para falar e aliviar a súa soidade.
Estas tarxetas estarán tamén dispoñibles en farmacias e centros de saúde do municipio para facilitar que todos os maiores poidan coñecer o programa e participar nel se o consideran oportuno. Ademais, para detectar se a soidade é un problema, na carta inclúen tres preguntas que os destinatarios deben responder cun si ou un non. Se reciben menos de tres chamadas á semana, se ven con menos de tres persoas á semana ou se non saben a quen chamar en caso de urxencia, é que están sós e necesitan unha axuda que empezarán a prestala desde Servizos Sociais de forma inmediata.
Destacan desde o departamento que dirixe Rosa Fernández, que este servizo é a custo cero e asumirano de bo grado todos os traballadores deste edificio. Aínda así, esperan que sexan moitos os veciños que se acollan ao programa e "xa buscaremos a forma de atendelos a todos", aseguran. Piden ademais un esforzo a toda a cidadanía, sobre todo nestas datas do Nadal nas que moitas familias non poderán reunirse pola pandemia, para que dediquen cinco minutos da súa rutina diaria a saudar, conversar ou ter un detalle con aqueles veciños maiores que non teñen a ninguén.