Clase práctica sobre compostaxe para dez alumnas na busca de emprego
Por Redacción
Dez alumnas do Curso de Mestría en Compostaxe promovido por Amigos da Terra e financiado polo Ministerio para a Transición Ecolóxica e o Fondo Social Europeo dentro do programa ‘Emprega Verde’ participaban este luns en Caldas de Reis nunhas clases prácticas sobre o funcionamento dos centros de compostaxe comunitaria do Plan Revitaliza da Deputación de Pontevedra.
A mestra composteira Beatriz Fernández Lorenzo encargouse de explicar cales son as tarefas do persoal técnico de mantemento destes centros de compostaxe.
A demostración práctica resultou ser un complemento axeitado da formación teórica que veñen recibindo no curso, de cara a poder atopar emprego neste sector, cada vez con máis oportunidades profesionais pola obriga dos concellos de xestionar o seu lixo de maneira máis sustentable seguindo as directrices da Unión Europea.
Ademais das alumnas, participaron nas clases prácticas o técnico de Medio Ambiente do Concello de Caldas de Reis, unha das persoas en formación de Illa de Príncipe e dúas técnicas do concello lugués de Foz, que manifestaron a o seu interese en implantar un modelo de xestión como o Revitaliza no seu municipio.
As alumnas interesáronse por aspectos prácticos na xestión dos caixóns de compostaxe, como o número de veces que é preciso remexer o material que dá lugar ao compost; cal é o tempo en que tarda en encherse o módulo de achega de residuos orgánicos; ou o prazo no que madura correctamente o compost.
Un dos obxectivos do Plan Revitaliza da Deputación é favorecer a través da formación que se xere emprego local, cunha aposta pola dinamización e o asentamento no rural. O Revitaliza realizou ata o de agora 74 contratos de bolseiros ou persoal en prácticas, contratou a 20 interinos por execución de programa, e facilitou a contratación de 27 interinos nos concellos da provincia.
Relacionadas:
-
O Plan Revitaliza inicia o curso nos centros de ensino
Por Oskar Viéitez |
-
Caldas contrata a unha mestra e un arquitecto baixo o programa de emprego da Deputación
Por Redacción |
-
Recollen máis de 120 toneladas de residuos orgánicos a través do sistema de compostaxe domiciliaria
Por Redacción |
-
A compostaxe revélase coma un importante nicho de emprego con moitas saídas
Por Redacción |
-
As illas do chocolate renuncian ao fertilizante sintético e copian o sistema de compostaxe da Deputación
Por Oskar Viéitez & Mónica Patxot |
-
Revitaliza ofrecerá actividades sobre compostaxe en obradoiros e campamentos de verán
Por Redacción |