Casa Solla e Hama, un coctail estrela
Hama Coctail Bar de Pontevedra e Casa Solla, ou o que é o mesmo, Luís López Rodiño e o chef estrela Michelín, Pepe Solla, acaban de poñer en marcha unha nova e atractiva experiencia gastronómica en forma de colaboración entre ambos, como continuidade ao realizado nos xardíns de Casa Solla, en Poio, durante o pasado verán. Neste caso, o escenario trasládase ao local do Hama, na pontevedresa rúa da Palma, onde clientes e amigos teñen xa á súa disposición toda unha carta de saborosas tentacións para gozar.
"Este verán estivemos a facer unha colaboración, Pepe e eu, -di Luís- cun corner de Hama no xardín de Casa Solla, e tratábase de darlle un complemento e continuidade a esa experiencia que supón comer na casa Solla, facilitando que os clientes puidesen gozar antes ou despois da comida dun coctail, un aperitivo, un gyn-tonic, ou o que quixesen. Funcionou moi ben, foi unha experiencia moi positiva para ambos, e agora que vén o inverno e non podemos gozar do xardín, tentamos darlle a volta a esa colaboración, e dadas as circunstancias que vivimos, que hai que reinventar os negocios, decidimos en Hama incorporar o concepto "brunch", ou sexa, comida informal, a calquera hora do día, ou almorzo tardío, cunha carta de bocadillos "molones", deseñados e desenvolvidos polo gran Pepe Solla.
O Chef estrela ampliaba a explicación, indicando: "A idea, como che dicía Luís, é continuar a colaboración que houbo durante o verán, complementando o Hama Bar, sobre todo pensando en certas horas na que non é a idea para comer ou cear, senón que estás a media tarde e queres compensar un pouco coa copa que estás tomando. Aí ocurréusenos o tema "bocatas", pans, que funcionaba incrible. Así, empezamos con seis bocatas, con seis propostas con catro pans distintos nos que incorporamos un vegano e outro vexetariano, para dar resposta tamén a unha tendencia en alza. Todos eles irémolos rotando cada certo tempo para que non sexan sempre sistemáticos. Por exemplo, que empeza a caza, pois faremos algo con caza, que empezan os cogomelos, faremos algo con cogomelos, é dicir, o que se nos vaia ocorrendo e que nos permita dar un punto dinámico á oferta".
A nova oferta estará dispoñible todos os días, nos horarios de apertura habituais do Hama Coctail Bar, na rúa A Palma de Pontevedra, cun titular que podería definir esta alianza entre dous grandes hostaleiros: "Casa Solla e Hama, un coctail estrela", titular que tanto Pepe como Luís aceptan como boa definición da súa apetitosa proposta: "Xa o foi durante o verán -expresa Pepe- porque Casa Solla xa deu un paso grande por ter alí a Luís no noso xardín, tanto facendo aperitivos como na sobremesa, cousa que o público agradeceu moitísimo, porque foi como un recuncho máxico, no que logo pasaron cousas máxicas como un concerto de Iván Ferreiro, e que aproveitamos para anunciar que o próximo ano haberá máis cousas destas, porque tanto ao público como a nós gustounos moitísimo e queremos volver facelo. O cóctail funcionou alí, e agora ten que funcionar aquí".
En tempos de crises, Luís resaltaba que "a relación calidade-prezo sempre é unha baza moi importante. Será un pouquiño máis do estandar, porque traballamos con produtos de primeirísima calidade, pero será unha opción para comer por pouco diñeiro algo moi chulo".
Bocaditos de Pepe Solla para o Hama Coctail Bar
O chef "estrela Michelín", Pepe Solla, deseña uns bocadiños moi especiais para o Hama Coctail Bar de Luís López Rodiño
© PontevedraViva
Relacionadas:
-
Café e bolo gratis para quen o necesite: "Na hostalería estamos mal, pero hai xente que non ten nin para un café"
Por Natalia Puga & Mónica Patxot |
-
Pepe Solla, pregoeiro da Peregrina polo seu prestixio profesional e o seu labor solidario durante a pandemia
Por Natalia Puga & Cristina Saiz |
-
Casa Solla, entre os restaurantes "únicos no mundo" que Amazon amosará nun documental
Por Alejandro Espiño |
-
Que fan Amaro Ferreiro e Pepe Solla na Casa Museo de Colón?
Por Redacción |
-
‘Hama Cóctel Bar’ reinventa a coctelería a domicilio
Por Noticia patrocinada |