A redeira Manolita Domínguez recibirá este ano a Raia de Ouro
Por Redacción
A Festa dA Raia, que esta fin de semana chegará á súa vixesimo cuarta edición, xa ten persoa á que homenaxear co seu tradicional Raia de Ouro. Nesta ocasión, será unha das veciñas máis queridas de Portonovo: Manolita Domínguez.
"Queremos recoñecer a aposta firme e continua que Manolita fixo ao longo da súa traxectoria profesional por Portonovo, respondendo sempre ante a vila mariñeira sen ter en conta o vaivén d economía nin a oportunidade", explicou o alcalde, Telmo Martín.
Manolita Dominguez Outeda naceu en Portonovo en 1940. Aos 12 anos comezou a aprender o oficio de redeira ao saír do colexio. "Era cativa coma a fame pero ataba que daba gusto verme atar", lembra.
Cando empezou tiña ata sete xefas diferentes, para as que ataba e coas que aprendía a perfeccionar as técnicas. Aos 18 anos quixo emprender e formou o seu propio grupo de atadoras, empezando con seis mozas e chegando a ter un grupo de máis de 34 persoas que día a día aprendían ao seu lado.
Ademais de redeira, Manolita destaca que é famosa, "pois xa fixen cinco programas de televisión".
Manolita é moi querida en Portonovo e está tremendamente agradecida coa entrega deste galardón, pero non o esperaba. "Cando me chegou o alcalde pola porta, pensei que viña pedir o voto, pero nunca me imaxinei isto", di.
Será o propio alcalde de Sanxenxo, Telmo Martín, o encargado de entregar este galardón durante o acto oficial que terá lugar o domingo día 5 de maio.
A imposición desta insignia constitúe unha das principais citas da programación que se desenvolverá a próxima fin de semana na lonxa de Portonovo.