Marín recoñece no seu 8M a traxectoria das mulleres do sector dos elaborados do mar
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
![](/web/cache/scene/uploads/fotos/foto/506/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/5c8293f7a7-e21e0f31-c5ca-4ed4-a08b-c450b18cda24.jpg)
© Concello de Marín
![](/web/cache/scene/uploads/fotos/foto/911/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/5c82945bcf-5897cbb0-36ad-404e-90f0-723e7488aedb.jpg)
© Concello de Marín
A vinculación que Marín ten co seu porto e con todas as empresas que traballan no sector do mar é indubidable. De aí que este 8 de marzo, Día Internacional da Muller, o acto institucional do Concello tivera como protagonistas ás mulleres traballadoras dos elaborados do mar.
A homenaxe, extensible a todo o colectivo, personificouse en cinco de estas mulleres: Carmela Villaverde Loira, Sandra Couñago López, Vanesa Couñago López, Marisa Abilleira e Carmen López Freaza, como representantes das traballadoras das empresas do porto.
O goberno municipal quixo recoñecer o camiño de loita que iniciaron hai un ano para conseguir unhas condicións laborais dignas e acabar coa súa precariedade no traballo.
Ante un salón de plenos ateigado de público, todas elas falaron sobre os dereitos que reivindicaban no seu posto laboral, o proceso para organizarse e unirse, os cambios conseguidos coas súas mobilizacións, as diferenzas entre o persoal fixo e o que vén das ETT e o que aínda falla por facer.
Ademais, pediron respecto e unión de todas e todos para rematar con estas inxustizas laborais, especialmente no sector no que as condicións de traballo son moi duras e están expostas a condicións extremas.
Gran parte da xente que acudiu a esta homenaxe eran mulleres que, con motivo da folga convocada para este 8M, deixaron o seu posto laboral nas fábricas de elaborados do porto e foron camiñando ata a casa consistorial.