Sen choiva no horizonte para recibir os Reis Magos
Por Redacción
A chegada de 2019, ademais dunha notable baixada de temperaturas, despexou a ameaza de choivas. Polo menos, nos seus primeiros días. E para a chegada dos Reis Magos, este sábado 5 de xaneiro, non se esperan precipitacións en Pontevedra.
A previsión de Meteogalicia recolle un panorama moi similar ao dos últimos días. Os ceos estarán despexados ou pouco cubertos. As temperaturas, pola súa banda, non superarán os 17 graos e a mínima situarase en tan só un.
Para os seguintes días, as mínimas irán subindo moderadamente e as máximas manteranse sen cambios.
A estabilidade atmosférica será a tónica xeral a partir do domingo 6 de xaneiro e, polo menos ata o xoves 10, seguirá lucindo o sol en Pontevedra.
As temperaturas serán agradables ao principio da tarde e frías na madrugada, aínda que subirán ata 4 graos de mínima, o que seguirá formando xeadas durante a noite.