Unha carpa na Praza de España recibirá aos Reis Magos en Ponte Caldelas
Por Redacción
Un ano máis, os Reis Magos adiantan a súa chegada a Ponte Caldelas. Un festival, que se celebrará este venres 4 de xaneiro, servirá para dar a benvida ás Súas Maxestades de Oriente.
Ante as boas previsións meteorolóxicas, a festa será nunha carpa de 450 metros cadrados que se instalará na nova Praza de España.
A chegada de Melchor, Gaspar e Baltasar será ás 18.00 horas, momento en que partirá a cabalgata dende a praza do colexio Cordo Boullosa, para subir pola rúa Concepción Arenal, xirar pola avenida de Pontevedra e continuar ata a Casa da Cultura, avenida de Marín e remate na praza de España. No percorrido repartiranse moitos quilos de caramelos.
O evento inclúe este ano catro carrozas, unha por cada rei e unha cuarta decorada con motivos de Disney.
Ao remate do periplo polo centro urbano, os Reis Magos recibirán a todos os rapaces dentro da carpa. A continuación comezará a gran festa coa animación humorística e musical a cargo de Pedro Campos, que continuará ata o remate da tarde. Todos os nenos recibirán un agasallo.
A festa contará tamén co aliciente de que se servirá chocolate con rosca típico destas datas.