Un mozo de 28 anos, detido por darlle puñadas e labazadas a unha muller en plena rúa
Por Redacción
Un mozo de 28 anos foi detido pola Policía Local de Pontevedra acusado de agredir a unha muller en plena rúa, á que segundo diversas testemuñas pegoulle varias puñadas e labazadas na cara.
Segundo informou a Policía Local, o suceso produciuse sobre as cinco da madrugada do pasado domingo 16 de decembro.
Os axentes, que se atopaban de patrulla pola rúa Serra, foron requiridos por unha persoa que relatou como o mozo ía pegando puñadas á muller camiño do mercado de abastos.
Estes presuntos malos tratos foron confirmados por unha segunda testemuña, que afirmou ver como o home lle dera un bofetón á vítima, tirándoa ao chan nas inmediacións do aparcadoiro da rúa Xoán Manuel Pintos.
A Policía interceptou ao agresor pouco despois na avenida de Buenos Aires, mentres que a muller foi localizada na avenida de Compostela. Ela asegurou que non fora agredida e non quería presentar denuncia.
Con todo, os axentes comprobaron que a muller recibira un golpe no pómulo esquerdo, tiña unha marca de dedos no pescozo e levaba a roupa sucia de caer ao chan.
Ante estas evidencias, o mozo foi detido como presunto autor dun delito de violencia de xénero.