Os cemiterios municipais, controlados pola Policía Local de cara a Todos os Santos
Por Redacción
A Policía Local de Pontevedra deu a coñecer o dispositivo especial de control de tráfico que se despregará os días 31 de outubro e 1 de novembro nos arredores dos camposantos municipais de San Amaro e Lérez.
Este plan aplicarase en previsión dunha gran afluencia de persoas aos cemiterios co gallo da festividade de Todos os Santos.
En San Amaro, co fin de facilitar o estacionamento a ambos os dous lados, e por mor do escaso números de prazas de estacionamento na zona, é preciso desviar o tráfico nas inmediacións, deixando unha vía de entrada e outra de saída para evitar atrancos e retencións.
O acceso ao cemiterio farase dende a rúa San Amaro cara a rúa Camposanto e polo tanto impedirase o acceso de vehículos procedentes da rúa Pintor Laxeiro cara o cemiterio, desviándose o tráfico á altura da rúa Pintor Ricardo Portela cara Xoán Carlos I.
Pola súa banda, en Lérez permitirase o estacionamento no acceso ao cemiterio e o aparcadoiro polo que se vai a establecer un sentido único de circulación.
Así, o acceso farase polo interior habitual da zona da Piolla e a saída seguindo esta mesma vía cara o Outeiro onde se accede novamente á estrada de Campo Lameiro.