Cerdedo estreará a súa nova residencia de maiores nun prazo de 18 meses
Por Redacción
O xerente do Consorcio Galego de Servizos de Igualdade e Benestar da Consellería de Política Social, Perfecto Rodríguez, acompañado polo delegado territorial da Xunta de Galicia en Pontevedra, José Manuel Cores Tourís, e polo presidente da xunta xestora de Cerdedo-Cotobade, Jorge Cubela López, asistiu este venres ao comezo das obras de ampliación do centro para atención aos maiores de Cerdedo.
A sinatura da acta de replanteo, que se levou a cabo nas dúas parcelas nas que se executará esta actuación, supón o inicio inmediato das obras, que teñen un prazo de execución de 18 meses e que acometerá a empresa Ogmios Proyecto S.L., seleccionada no proceso de licitación.
A construción dun edificio anexo ao actual que comparten centro de día e residencia, permitirá que o novo inmoble albergue a parte residencial, cuxa oferta pasará de 18 a 48 prazas, mentres que o inmoble que xa existe estará dedicado en exclusiva ao centro de día, mantendo este a súa capacidade máxima de 30 usuarios, pero mellorando polo tanto a calidade na prestación do servizo para os maiores.
O Consorcio investirá un total de 1,7 millóns de euros nesta actuación, repartidos en tres anualidades, dende o presente ano 2018 e ata 2020. As obras suporán 1.451.559,93 euros, reservándose a diferencia ata 1,7 millóns para os custos de dirección de obra e estudos, así como para o equipamento e amoblamento da nova residencia.
O edificio que se vai construír en Cerdedo ocupará dúas parcelas lindeiras ao actual inmoble do centro de día-residencia. Un deses terreos é propiedade do Consorcio Galego de Servizos de Igualdade e Benestar e, o outro, foi adquirido polo Concello para posteriormente poñelo a disposición da administración autonómica.
A construción da nova residencia de Cerdedo será posible gracias ao convenio de colaboración asinado entre a Consellería de Política Social do goberno galego e o Concello de Cerdedo-Cotobade.
Relacionadas:
-
A Xunta licitará este mes o equipamento da residencia de maiores de Cerdedo
Por Redacción |
-
Cubela confía en que o novo xeriátrico de Cerdedo estea en funcionamento a finais de 2020
Por Redacción |
-
A Xunta de Galicia intensifica os coidados no fogar para as persoas maiores con dependencia que viven en Pontevedra
Por Redacción |
-
Comezan as obras de construción da nova residencia de Cerdedo
Por Redacción |
-
As obras de ampliación da residencia de Cerdedo comezarán en setembro
Por Redacción |