"Somos funcionarios, non moeda de cambio"
Varias decenas de traballadores do sector da xustiza en Pontevedra retomaron este xoves as concentracións e medidas de protesta que pararan durante os últimos días dentro da folga indefinida que manteñen desde o pasado 7 de febreiro.
Nesta ocasión, non saíron á rúa convocados por ningún sindicato, senón que o fixeron funcionarios alleos a ningunha sigla para reclamar dos sete sindicatos que no seu día convocaron a folga en unidade sindical que a retomen e deixen ao carón as desavinzas que manteñen desde hai días e que eclosionaron o pasado venres durante a votación do preacordo que asinaran catro deles coa Xunta de Galicia e que quedou anulado.
Nesta ocasión, os funcionarios corearon consignas como "Somos funcionarios, non moeda de cambio" dirixidos aos sete sindicatos e tamén outras máis centradas no vicepresidente da Xunta e conselleiro de Xustiza, Alfonso Rueda.
Pedíronlle que retome as negociacións ao berro de "Rueda, non é non, queremos negociación" e criticaron a súa actitude que ven pouco disposta a cumprir as reivindicacións dos traballadores: "Rueda, covarde, a Xustiza está que arde".
Mentres os traballadores concentrábanse ás portas dos xulgados da Parda, os sindicatos negocian un posible cesamento de hostilidades. Neste conflito laboral creáronse nos últimos días dúas posturas enfrontadas, dun lado Alternativas na Xustiza- CUT, STAJ e CIG e doutro SPJ-USO, FeSP UXT e CSIF. Con todo, nos últimos días SPJ-USO aliñouse alén.
Con esta nova composición, SPJ-USO, Alternativas na Xustiza- CUT, STAJ e CIG, que entre todos teñen a maioría do comité de folga dos funcionarios, convocaron este xoves a FeSP UXT e CSIF para tentar acordar unha proposta "que termine o conflito canto antes". Estes últimos finalmente non acudiron.
Relacionadas:
-
Os sindicatos denuncian unha "caza de bruxas" por parte da Xunta e a Fiscalía contra os delegados de xustiza
Por Oskar Viéitez |
-
Funcionarios da Xustiza saen á rúa con máscaras para criticar que lles impiden expresarse
Por Natalia Puga & Mónica Patxot |
-
Os tres meses de folga xeraron nos xulgados un atasco dun ano
Por Oskar Viéitez |
-
Os funcionarios de xustiza decididos a suspender a folga indefinida
Por Oskar Viéitez & Paula Sanmartín |
-
Funcionarios da Xustiza en Pontevedra foxen das siglas e piden aos sindicatos "sentido común e tolerancia"
Por Natalia Puga |
-
Traballadores de Xustiza piden que se retome a unidade sindical e haxa negociacións inmediatas
Por Natalia Puga & Mónica Patxot |
-
Votación nos xulgados da Parda ao berro de "traidores" e "vendidos"
Por Paula Sanmartín & Anxo Lourido |