Veciños de Cuntis, sen teléfono durante dez días polo roubo de cable
Por Redacción
Numerosos veciños de varios núcleos de Cuntis levan sen servizo telefónico desde o pasado 19 de decembro. O malestar é evidente e xa xerou varias queixas contra a compañía subministradora, Movistar.
Segundo explicou o Concello de Cuntis, o goberno municipal canalizou todas estas reclamacións e a única resposta por parte da compañía é que se produciu un roubo de cable nas zonas afectadas.
Por agora, descoñécese cando volverán ter liña.
As áreas afectadas pertencen á parroquia de San Mamede e son os lugares de Sobreira, Guimarey, Anllada e Soutelo.
Sobre todo, lembran desde o Concello, están a verse afectados os negocios de hostalería que se atopan na zona que quedaron sen servizo de teléfono.