Ponte Caldelas recadará cartos para os afectados polos incendios

Por Redacción
A través dunha conta bancaria, que se abrirá nos próximos días, o Concello de Ponte Caldelas recadará fondos para os afectados nos incendios do pasado domingo.
Os técnicos municipais elaborarán unhas bases e a formulación xurídica que permita garantir un reparto legal, xusto e transparente entre todos os afectados. Ao tempo, está valorando a organización dun festival solidario que sirva para impulsar a recadación.
Ducias de chamadas recibidas nos últimos días, tanto de veciños como de xente de fóra de Ponte Caldelas, animaron a impulsar esta iniciativa e a mellor fórmula, segundo o Concello, pasa por dar carácter oficial a esta solidariedade, sen prexuízo de que se poidan articular outras opcións por parte dos particulares prexudicados polo lume.
O alcalde, Andrés Díaz, adianta que a prioridade no reparto será para as familias, comezando polas que teñan perdido a súa vivenda ou sufrido danos nela. A continuación situará ás actividades empresariais, dando tamén prioridade aos traballadores autónomos que teñan perdido maquinaria ou instalacións que supoñan o seu medio de vida principal.
O Concello preparará un procedemento administrativo no que se teñan tamén en conta o nivel de ingresos (con informe dos servizos sociais municipais), o importe dos danos (avaliado por informe da arquitecta municipal) e a falta de cobertura por póliza de seguros. Tamén se esixirá que os beneficiarios sexan persoas empadroadas en Ponte Caldelas.
"Sabemos que é imposible indemnizar a todo o mundo, pero o Concello fará todo o que poida e non vai quedar de brazos cruzados mentres os nosos veciños sofren e ven con incerteza o seu futuro", afirma o alcalde, quen engade que o máis importante é deixar ben claros os criterios de reparto antes de empezar a recadar un só euro.
O Concello xa dispón duns formularios para recoller valoracións preliminares. Aconséllase a todas as persoas e empresas prexudicadas que pasen polas oficinas municipais e enchan os seus datos, achegando fotografías.
Relacionadas:
-
A vaga de incendios forestais volveu repetirse unha década despois
Por Redacción |
-
Ponte Caldelas coordinará con Cáritas a conta solidaria para os afectados polos incendios
Por Redacción |
-
Ponte Caldelas consumiu 100.000 litros de auga para loitar contra os lumes
Por Redacción |
-
Desbordados de solidariedade: "Está a axudarnos toda a xente que nos coñece, e moita que nin nos coñece"
Por Natalia Puga |
-
Ponte Caldelas trata de recuperar a normalidade tras os incendios do domingo
Por Redacción |
-
O día despois en Ponte Caldelas e Cerdedo-Cotobade: "Isto é un desastre. Terrible"
Por Alejandro Espiño |
-
Ponte Caldelas, en "máxima alerta" tras declararse varios incendios
Por Oskar Viéitez | Creada e actualizada