A CIG alerta dun novo cambio sobre o coeficiente redutor da idade de xubilación na frota galega
Por Redacción
A CIG volveu lanzar a voz de alarma ante a situación á que se enfrontan os mariñeiros galegos pola aplicación dos coeficientes redutores da idade de xubilación.
Xabier Aboi, secretario comarcal da FGAMT-CIG, alerta sobre a circular que enviou o director xeral do Instituto Social da Mariña (ISM) aos seus subalternos indicando que non poden acollerse aos coeficientes redutores do 0'40 aqueles tripulantes de palangreiros e arrastreiros conxeladores.
Aboi pregúntase que barcos galegos van poder evitar esta decisión adoptada cando xa se chegara a un acordo co goberno do Estado a finais de 2016 para resolver este problema. O representante sindical sinala que as frotas que están a traballar en NAFO, Malvinas, no Índico e no Pacífico non podería contar con este coeficiente redutor e iso obrigará ás tripulacións a seguir traballando varios anos máis dos que lles corresponderían coa cuota do 0'40.
Ante esta situación, a CIG xa convocou asembleas co obxectivo de iniciar unha campaña de protestas se non se resolve esta situación. Este martes reúnese o Instituto Social da Mariña en Madrid. E o sindicato nacionalista anunciou que solicitará un encontro con representantes de Pesca, Mariña Mercante e o ISM. Aboi quere que tamén acudan as patronais e integrantes da Xunta de Galicia porque esta medida só atinxe a barcos galegos.
O portavoz do sindicato cualifica de "falcatruada" este cambio por parte da administración, que pode chegar a afectar á tripulación de 90 embarcacións da comunidade autónoma. Xabier Aboi indicou que na reunión do Consello Galego de Pesca tamén reclamarán á Consellería do Mar que interveña neste conflito.